U MDC ka 2-War Central u ma Jamshaphrang Pohtam u dawa na ka sorkar ba ka dei ban khot shwa da ka jingialang paidbah ha shwa ba ka jingker sainar shiah kan treikam ha ki bynta khappud bad ka ri Bangladesh ha ki bynta jong ka shnong Muktapur-Jaliakhola haduh Pasadwar, khnang ba ki nongrep kin ioh ban pynpaw ia ka jingeh halor ki jaka rep ki hap shabar jong ka jingker.
U ma Jamshaphrang u la ong ‘Nga ieng skhem ha ka nongrim jong ki paidbah kiba dei ki trai jaka bad ki nongrep kiba im ja na ka kam rep kam riang ha ki jaka khappud bad ka Ri Bangladesh’.
Ula ong ka jingleh jong ka sorkar bad u Dolloi ka Elaka Satpator khlem da kynjoh ktien shwa ïa ki paidbah trai jaka ban sdang ïa ka jingpyntrei surok na ka bynta ban shna ïa ka jingker sainar shiah ha khappud na Muktapur-Jaliakhola-Pasadwar na u Border Pillar No 1283/7s haduh u Border Pillar No 1301/4s kala buh jingma pynban ïa ki jaka rep kiba don shabar jong ka jingker sainar.
“Kum ki nongshong shnong ka Ri India, ngi im haka ri synshar paidbah bad ka sur jong uba bun ba lang ka long kaba hakhmat eh haka rukom treikam jong ka sorkar, da kaba shim ïa ka rai lyngba ka jingïalang pynsngewthuh paidbah” ong utei u MDC haba kren sha ki lad pathai khubor ha Jaliakhola.
Shuh shuh ula ong kaei kaba jia pat mynta? ka sorkar kala pheil haka rukom treikam bad kam shym la burom satia ïa ki paidbah nongshong shnong. Ula kynthoh halor ka jingleh jong u Dolloi ka Elaka u bym shym la burom shuh ïa ka hok ka kynti jong ki trai jaka kaba la wanrah jingklumar mynta hapoh kine ki phra shnong.
Halor kane u kyntu ïa ka sorkar ba kan khot ïa baroh ki nongshong shnong da ka jingïalang paidbah (public hearing) ban weng noh shi syndon ïa kane ka jingeh. Ula kyntu ruh ïa u Dolloi ban un mih shakhmat ban lum ïa ki paidbah bad lada um lah ban ïaid ryngkat ryngkat bad ki paidbah ka lah ban wanrah ka jingbym burom kylliang shuh ïa u kum u Dalloi.
Kum u MDC ula kren shai un ïeng halor ka nongrim jong ki paidbah, da kaba ong ‘ki bri kwai bad ki bri soh ki dei ki jingkyrkhu bala ai da U Blei bad ngim dei ban pyrshang lane knieh jubor ïa kane ka jingai u Blei’, namar ‘lada phi pom pathar ïa ki dieng kwai ka long kumba pom ïa ka khlieh briew’, la pynkut utei u MDC.
