Ha ka jingïai bteng ban pynduh pyndam ïa ka jingpyndonkam beaiñ ïa u drok hapoh ka jylla, ka kynhun jong ki Pulit ka jylla Meghalaya ba la lamkhmat da u Inspector General of Police (CID), Meghalaya, u Aditya Goenka, IPS, ha kane ka 29 tarik u Kylalyngkot ki la leit ban thang ne pynduh noh ia une u kynja jingdih pynbuaid u Kynja bad kiwei ki kynja jingdih ba iasyriem bad u Drugs kiba la ioh kurup da ki Pulit ha ki por ba la dep. Ia kine ki kynja jingdih pynbuiad kiba long pyrshah ia ka aiñ la thang ha ka ka karkhana Star Cement Ltd., Lumshnong, East Jaiñtia Hills District, ha ka jingdon lang jong ki Superintendent of Police jong ka East Jaiñtia Hills, East Khasi Hills, West Khasi Hills, South West Khasi Hills bad kiwei de ki heh Pulit.
Haba kren sha ki lad pathai khubor, u Inspector General of Police (CID), Meghalaya, u Goenka, u la ong ba ka thong jong ka jingpynduh ia kine ki jingdih pynbuiad ka long ka jingbteng ka District Disposal Committees, ban pynthikna ba ka jingpynjot ne pynduh ïa kine ki kynja jingdih ba la kurup kan long katkum ka rukom saïan bad katkum ka aiñ. U la pyntip ba baroh kiba la thang ki kynthup ïa 183 gram u Heroin, 296 kilogram u ganja, 9 kilogram u methamphetamine, 2,793 tylli ki bottle cough syrup ba don u codeine bad 534 tylli ki tablet R-7.
U la ong shuh shuh ba ka jingshongdor jong kine ki drok ba la pynjot ha ka ïew ïadie ïathied ka pyrthei ka long kumba ₹9.11 klur. U la pynthikna ruh ba ka Meghalaya Police ryngkat bad ka Sorkar Jylla ki long kiba la kut jingmut ban pynlong ïa ka Meghalaya kum ka jylla kaba lait na u drok bad ba ki jingïakhun pyrshah ïa ka jingïadie drok ki dang ïai bteng ha kylleng ki bynta jong ka jylla. U la pyntip ruh ba kine ki jingïohkurup ki la jia ha kaba jingïadei bad 58 tylli ki case ba la register ha ki District bapher bapher.
Shuh shuh, u Goenka u la ong ba hapoh ka jingïalam jong u Chief Minister ka Jylla, u Conrad K. Sangma, ka DREAM Mission ka la long kawei na ki kam ne ka mission kaba la iaid shakhmat ka jingtreikam jong ka. U la ong ruh ba ka jingïakhun pyrshah ïa u drok kam dei tang ban pynduh ia u hynrei ka jingiarap ruh ïa kiba la ngop ha u drok ne ka long kawei na ka sienjam ban ïada ïa ki briew kiba lah ban shah ktah na ka jingma jong ka jingpyndonkam ïa u drok.
Katkum ka jingai jingkheiñ na ka ophis jong u Superintendent of Police (ANTF), Meghalaya, Shillong kala pyni kumne harum:-
