U MLA ka Nartiang Constituency u ma Sniawbhalang Dhar uba dei ruh u Symbub Myntri Rangbah ka Jylla, hynnin ka sngi 29 tarik u Kyllalyngkot, ula ai jingïarap haduh 10 lak tyngka sha ka Sports Club jong ka shnong Khonsaro na ka bynta ban shna pynbha ïa ka madan phutbol jong ka shnong.
Kane ka jingïarap ka long ban kyntiew ïa ki khun samla ha ka liang ki jingïalehkai bad ban pynshlur ïa ki samla ban shim bynta ha ka kam Sports.
Na ka liang u MLA haba kren ula ban jur ïa ka bynta kaba kongsan eh jong ka jingïalehkai Sports kaba long kawei na ki lad ban tei ïa ki khun samla ha ki kam ki jam bad ka koit ka khiah bad ruh ka jingïatylli haka shnong ka thaw.
Katba ki dkhot ka Shnong ki la pynpaw ïa ka jingsngewnguh ïa u MLA bad ki la kular ïa kane ka pisa bala ïoh yn pyndonkam hok na ka bynta ka jingpynbha ïa ka madan phutbol jong ka shnong.
