Ka Khasi Students’ Union ba kynthup na ki Nongialam ka Khasi Students’ Union San Shnong Unit ha ka jingialam da u samla Jerimiah Dkhar, President, Khasi Students’ Union South West Border Circle ha ka jingialam u Samla Aandrias Talang, Education Secretary, bad kumjuh ha ka jing synran lang ki Nongialam ka Khasi Students’ Union East Jaintia Hills District Unit ba kynthup ia u Samla Shaniahskhem Dkhar, Finance Secretary bad Samla Hamewanpynhun Ryngkhlem, Publicity Secretary, mynta ka sngi ki la iakynduh markhmat bad u Executive Engineer jong ka tnad bording (Me.P.D.C.L Khliehriat Division) ban pynsngew halor ka jingma kaba khraw ha ka rukom sam bording elektrik ha ka shnong Mutong, bad kumjuh ban bud dien ia ki sienjam ki ba ka tnat (Department) bording ka shim ha ka ba iadei bad ka jing sam Bording sha ki Shnong Khappud Indo-Bangla ha East Jaintia Hills District, Meghalaya.
Ha kane ka iakynduh, ka Union ka la pynsngew ia ki jingeh kaba ki paidbah ki shem jingeh ha ka ba iadei bad ka rukom ring bording, ka ba ka seng ka la lap ba ha bun na ki bynta jong ka shnong Mutong, ki paidbah ki shem jingeh shibun ha ka ba ring bording namar ka jingbym pynbiang ia ki post (pole) elektrik, ki paidbah kim banse ha ba ki ring bording ki pyndon kam da ki dieng siej ban kyrshan ia u wire naduh na pole electric haduh ki iing jong ki watla ka jingjngai ka long da ki phew phew metre ruh. Ka KSU ka la pynpaw ba kane ka jingleh jong ki nongshong Shnong kam dei ka mon sngewbha jong ki, hynrei na ka jingdonkam, tang ban bteng ia ka jingpynbiang bording elektrik ha la ki jong ki ïing bad kane ka dei beit na ka jingbym pynbiang ia ki pole elektrik da ka tnad ba dei peit. Ka Union ka la dawa jur ba ka tnad kan shimkhia mardor ban pynlong ia ka jingleit ït bniah bad ban pynbiang ia ka rukom sam bording sha ki paidbah ha ka shnong Mutong baroh kawei bad ban pynbiang noh khlem pynslem ia ki pole elektrik khnang ba kan long kum ka lad jingïada ia ka jingim briew bad kan nym don kano ka jing jia ba jingsngew sih bad khamtam ia ka jingshngain jong ki nongshong shnong.
Ha ka ba iadei pat ka ka jingsam bording sha ki Shnong Khappud dang ha kine ki sngi ka KSU South West Border Circle ka la ioh pdiang ia ki jubab na ka Dorkhas ka ba ka seng ka dawa na ka sorkar ban sam Bording sha ki Shnong Khappud bad kumjuh pan jingpynshai halor ka jing bym pat don bording, ka ba ka seng ka la dep phah sha ka tnat bording kumjuh ha ka ba iadei bad ka jingthmu jong ka sorkar bad ki sienjam ki ba ka sorkar ka shim ban pynbiang bad sam bording sha ki Shnong Khappud India – Bangladesh ha poh East Jaintia Hills District, lyngba ka jubab ba ka seng ka ioh pdiang na ka tnat sam bording ba ka sorkar ka la don ka jing thmu ban pynpoi bording sha ki nongshong shnong lyngba ka scheme “Revamped Distribution Sector Scheme (RDSS) for the Unelectricfied Household (UEHH)”.
Ha ba kylli na u tei u officer ba lano kata ka kam kan sdang? Ka jubab ka long ba ka tnat sam bording kan sa trei shitom lada long ka ba lah ba ha u bnai March – April mynta u snem kan sa sdang lada kam don kano kano ka jingthut ha ka ba pyntrei kam ia ka tei ka scheme ban sam bording sha ki Shnong Khappud ba kynthup ia ka Shnong Lejri, Lahalein, Huroi bad Hingaria bad kumjuh ia baroh ki Border Security Force (BSF) Out Post ki ba don shi lynter ha Khappud ka India – Bangladesh.
Ka seng ka buh ruh ka jingkyrpad ia ka tnad bording ba kan sngewbha ban shimkia ia kitei ki ar tylli ki mat jingdawa ka seng khnang ba kin long kum ki jingkyrkhu ia ki Shnong Nongkyndong bad kumjuh khamtam ia ki para doh para snam ki ba shong ba sah ha Khappud ki ba long kum ki nongiada ia ka ri bad ka jaid Bynriew hi baroh kawei.
