U ma Balen Thubru uwei na ki trai trok mynta ka sngi haka jingkren sha ki lad pathai khubor ha Mihmyntdu By-pass West Jaiñtia Hills, u kwah ban pynshai ïa ka jingkynnoh jong u President ka Jaiñtia Hills Truck Owners’ Association (JHTOA) u ma Biangshwa Shylla kaba long pyrshah ïa u.
Na ka liang u ma Balen Thubru ula ïathuh haka 27 tarik u Kyllalyngkot utei u President ula khot pynlong ïa ka jingïalang da kaba thung tang 5 ngut ki nongkren ha katei ka sngi, hynrei kum u trai trok u ma Balen ula pan jubab haka jingïalang hynrei ula shah weng bad ym shym la ai lad satia ïa u ban kren da kaba kheiñ ba um long u member jong ka Association bad kumta kala mih ka jingïania kaba jur.
Shuh shuh ula ong “Kumno um shym la kheiñ Member haba man ka sngi ki kali jong nga ki mih ban leit kit ïa ki mar da ka slip jong ka Association, hynrei kumno pat u khlem ithuh ïa nga”. U kwah ruh ban pynshai halor ka jingkynnoh ba u ma Balen ula thaw bun ki Association, da kaba pynshai ïa kane ka nongrim jong u ka long ban ïeng na kaba bynta ka bha ka miat jong ki trai trok ban dawa pynkiew ïa ka bai kali na ki kharkhana da kaba ïasnohkti lang bad ka MCTODA.
U ma Balen ula pynsngew hadien bala dep seng ïa ka Join Action Committee kaba kynthup lang ïa ki seng bapher bapher jong ki trok ban ïakhih ïa ka hok na ki karkhana, la thung Chairman ïa u ma Biangshwa Shylla bad tang katto katne sngi ula shet kylla da kaba weng noh ïa kane ka kam Chairman, hynrei da ka jingïatreilang bad ka MCTODA ngi la trei shitom ban dawa pynkiew bai kali na ki karkhana, ula ong.
Hynrei kaba sngewsih pat ka long haka por ba dang ïakhih utei u President ula pynsngew paidbah pynban ba kane ka jingïakhih jong ki kala pynduh nong pynban ïa u, kumta u ma Balen ula pynrem jur halor kano ka nongrim ba u duh nong, ‘lada um dei u Agent jong ki Company, kumno u nud ban pynpaw ka jingduhnong bad kane ka paw ba udei shisha u Agent ki kharkhana’.
Ha kaba ïadei bad ka report jingkheiñ jingdiah jong ka seng na ka liang utei u President ma Biangshwa Shylla ula pynshai la kumno kumno haduh 40 tylli ki kali haka shisngi kiba ïoh rung sa ki Karkhana ban kit mar bad ka bai slip ka long 150 tyngka kawei lada kheiñ haka shisnem ka long 14,600 tylli bad ka pisa ka poi T.21,90,000 tyngka, haba kheiñ hapoh lai snem ka jingtreikam jong u kum u President ka pisa kan poi T.65,70,000 tyngka.
Katba jingpynlut pynsep kumba la ïathuh da u President ka bai nongtrei naka bynta ar ngut haka dor 15,000/- u wei haba kheiñ ha ki lai snem ka long T.10,80,000/- tyngka, ka pisa ba thied jaka 16 lak tyngka nalor kiwei de bad ka pisa ba dang sah na ka (collection) ka long T.28,90,000/- tyngka. Na ka liang u Balen u kwan ban ïoh jingshai ïa kane.
Halor ka jingkynnoh jong u ïa ka kam President u ma Balen Thubru ha ki por mynshwa ba um shym la treikam la 15 snem, u ma Balen u pynshai ïa kane haka por ba u long President u ma Biangshwa u dang long tang u khynnah bad ki paidbah ki ïohi ïa ki kam ba bha jong u haka imlang shalang wat ha ki jingïalang bunsien u pyllut nalade hi.
Ha kaba ïadei bad ka jingkam u President ma Biangshwa Shylla ba ka Association ka ïaid katkum ka Constitution hynrei na ka liang ki trai kali kim shym la ïohi ïa kata ka Constitution kaba la shna tang katto katne ngut.
Shuh shuh u ma Balen Thubru u kwah ban pynshai ba ka jingïalang kala dep shim ïa ka rai ba haka 3 tarik Rymphang kin pynlong ïa ka General Meeting ha 7-Mer Toll Gate haka por 11 baje mynstep na ka bynta ban pynshai ïa ki kam ba dang sah, lada u President um lah ban wan na ka liang ka jingïalang kan jied hi ïa u President ba thymmai bad la kyrpad ïa baroh naduh ki trai trok bad ki nongniah ba kin wan sha katei ka jingïalang.
