Mynta ka sngi la ioh ban plie ia ka Children and Adolescents Library and Digital Infrastructure kaba don ha jan ka ïing skul Nongtalang Govt Higher Secondary School, Nongtalang, ia kane ka Library la wan ban plie ia ka da u bah Lahkmen Rymbui uba dei u local MLA bad Minister ka sorkar jylla ba bat ia ka tnad pule puthi (Education) kum u kongsan, haka jingiadon lang u ma Damuthimi Lyngdoh, Block Development Officer (BDO) jong ka Amlarem C & RD Block kum u symbud kongsan, ha ryngkat u bah Min Lyngdoh, Headman, u bah Kat Kassar, Secretary jong ka shnong Nongtalang, ki Self-Help Group (SHG )bad kiwei kiwei de ki riew rangbah.
Kan long ka sngi ka ban sah jingkynmaw ia ka shnong Nongtalang bad khamtam eh ia ki khynnah pule jong ka shnong Nongtalang hi baroh kawei ba kin ioh ban pyndonkam kat kum ka jingdawa ka por.
Ia kane ka ïing la shna lyngba ka Scheme shispah sngi (Mahatma Gandhi National Rural Employment Guarantee Scheme) MGNREGS daka jingiatrei lang ka Amlarem Block bad VEC Nongtalang.
U bah Lahkmen Rymbui haba ai jingkren kum u kongsan u la ai ka jingiaroh ia ki nongtrei ka Amlarem C & RD Block bad kumjuh ia ka VEC jong ka shnong Nongtalang kiba la pyntrei hok ia ka pisa paidbah kumba la mang. U la kyntu khamtam ia ki khynnah skul ba kin pyndonkam hok ia kane ka Library, khnang ban ioh kham bun ki jingmyntoi nalor ki kot pule ha skul.
