Ki Nongialam Shnong jong ka Shnong Hingaria, East Jaintia Hills District, ha ka 30 January 2026 ki la leit buh jingthoh bad ban pan jingshai halor ka jingshah pynkynriah (Relocate) jong ka Sub-Centre ba la mang ban shna na duh ka samoi 2023-2024 (Approval Year 2023-2024), hynrei tad haduh mynta na ka liang ka office DM&HO ka khlem pat pyntrei ei ei ruh wat la hadien ba na ka liang ka Shnong ka la ai Sngewbha ia ka jaka ban shna ia katei ka Sub-centre.
Ha ba pyrshang ban ia kren bad pan jingpynshai na ka liang u DM&HO u la iathuh ba iakane ka sub-centre ka ka sorkar ka la pynkynriah sha ka wei pat ka District da ka ba ai daw ba ka jaka ba ka dorbar Shnong ka ai kam pat biang, te kumta ia kane ka Sub-centre la kynriah pat sha kiwei ki jaka.
Ka long ka ei ka ei ka ba lyngngoh ia ki nongialam shnong wat haba na ka liang ka ka Shnong kam tip ei ei shaphang kata ka jingbym dap lane bymbiang ka jaka ba na liang ka Shnong ka la de ban ai, ha ka ba na ka liang ka office DM&HO ki khlem ai jingtip ei ei sha ka shnong hynrei ki shu leh da ka bor ban pynkynriah bad pynduh ia katei ka Sub-centre ka ba na ka liang ki nongshong shnong ki da ap khmih lynti la slem.
Ka Shnong Hingaria ka don ha khappud bad ka Bangladesh bad ba jngai da ki spah kilometre ban poi sha ki jaka sumar bad ka jingbun paid kam duna shuh sha ka 2000 tam eiei hynrei ha ba phai pat ha ka liang ka koit ka khiah khamtam ha ki por mynshwa ki briew kim banse ban jam sha shiliang u pud ka Ri India ban leit wat ki jingsumar namar ha kito ki por ka lynti synkieng ruh kam pat biang ban leit shaduh Khliehriat, Jowai lane shillong. Hynrei pynban na ka liang ka sorkar wat ha duh mynta ruh ka khlem phai khmat sha kine ki thaiñ khamtam ha ka ba iadei bad ka koit ka khiah.
Kum ban shu pynkynmaw na ka liang ka sorkar ha u snem 2023-2024 ka la sanction ia katei ka Sub-centre ka Shnong Hingaria ha poh ka scheme PM-ABHIM (2nd Phase), ha kito ki por na ka liang ki nongshong shnong ki la ia kmen bad ai ka jingiaroh ia ka sorkar ba ka la phai khmat ban weng noh ia ki jingeh jong ki nongshong shnong ha ka ba iadei bad ka koit ka khiah, hynrei ka pynkyndit pynban ba mynta ka sorkar lymba ka office DM&HO ka la pynkynriah ia katei ka jingthmu da ka ba ai daw ba ka jaka kam biang wat la na ka liang ka dorbar Shnong kam tip ei ei shaphang kata ka jingbymbiang ka jaka. Lada ka office DM&HO lane ka Health Department ka ai ka jingtip sha ka shnong, ka Shnong ka don bun ki jaka ban ai wat ki Riew shimet ruh ki kloi ban ia Sngewbha ia la ki jong ki jaka sha Department ban shna Health Sub-centre na ka bynta ka bit ka biang ki nongshong shnong ha ka ba iadei bad ka koit ka khiah.
Namar ba ka rukom ai jingpynshai na ka liang ka office DM&HO kam long ka ba shai bad don nongrim ha ei ha ei ruh, kumta Dorbar Shnong Hingaria ka la rai ba kan iaid sha khmat ban shim da kiwei pat ki lynti lada dei ban leit iakynduh bad u Health Minister ka jylla lane da ka lynti jong ka aiñ ruh khnang ba ia ka hok ki nong shong Shnong ba la mang da ka sorkar kam dei ban duh.
Kane ka long katkum ka kyrwoh na u Waheh Shnong, ma Ting Khonglah.
