Ki Pulit ka Sadar Police Station ha ka 02 tarik Rymphang 2026 ki la khot hajir ïa ki arngut ki dkhot ka Federation of Khasi Jaiñtia and Garo People (FKJGP) ba kynthup ïa u President ka Nongmensong Circle u Bah Simon Myrthong bad ïa u Assistant Organising Secretary ka Mawlai Circle u Bah Gary Nelson Thangkhiew halor ka jingkynnoh ba ki ktah kti ïa uwei u nonghikai bar jylla uba hikai ha Time Coaching Centre kaba don ha Laitumkhrah.
Haba kren sha ki lad pathai khubor u Chief Organising Secretary ka FKJGP Central Body u Bah Khrawkupar Nongsiej u la ïathuh hadien ba ka Seng ka la ïoh ïa ka jingujor pyrshah ïa uwei u nonghikai bar jylla uba jrongkti ïa ki arngut ki khynnah kynthei kiba leit Coaching Class ha Time Coaching Centre, ki la leit ha katei ka Coaching Centre kaba don ha Laitumkhrah ban dawa ïa u Director jong katei ka Coaching Centre ba un beh kam noh mardor ia u nonghikai bar jylla uba jrong kti ia ki arngut ki kynthei kiba leit Coaching ha katei Centre.
Nalor kata u la pynpaw ïa ka jingsngew lyngngoh ba ki Pulit ki la khot hajir ïa ki dkhot jong ka seng kiba la leit ban ai jingïarap ïa ki arngut ki samla kynthei kiba shah jrong kti ha u bar jylla ha ka 14 tarik, Nailar, 2025.
U la pynpaw ruh wat ka Dorbar Shnong Laitumkhrah ruh ka la tuklar bad shimkhia halor kane ka jingjia hynrei kaba lyngngoh pat ka long ba ki Pulit ki khot hajir pynban ïa ki dkhot jong ka Seng kiba ïada ïa ki samla kynthei na ka jingshah jrong kti ha u bar jylla.
