[Photo Credit : T7News]
Kiba bun ki riew paidbah, khamtam ki nongñiah kali la ki dei ki kali Private, Tourist ne Local taxi ruh kila pynpaw ka jingwit jingthut bad jingsngewthuh bakla halor ka jingiohlad jong ki kali (Pick-up) ba kit Pisa kiba pyndonkam bakla ban pynpah ia ka Siren haba ki iaid ha ki lynti bah ha nongbah Jowai.
Katkum ka khubor ba la iohlum na ki riewpaidbah la iathuh ba la jan man la ka por kine ki kali Kit Pisa kiba leit buh pisa sha ki ATM bapher bapher, haba ki iaid ha ki surok bah khamtam ha ki bynta jong ka Newhill Lumsooiung shaduh ki thaiñ Ladthalaboh ki shait pynpah ia ki Siren jong ki, kiba iasyriem bad ki kali Ambulance ne ki kali Pulit.
Bunsien kine ki kali kila pynwit pynthut bha ia ka iaid ka ïeng ki kali haba ki pynpah ia kine ki Siren jong ki. Don ki khep ba ki nongñiah kali ki dang mut ba ki dei ki kali Ambulance, ne ki kali Pulit ne ki kali jong ki Minister kumta kila ialeh ban kiar pynkloi sha kyndong wat ha ki jaka ba khapngiah ruh, hynrei haba poi hajan pat la lap ba ki dei da kine ki kali Kit Pisa jong ki Bank bapher bapher.
Kumta ki bor jong ka aiñ kila dei ban bud dien bad ban pynshitom ia kum kine ki kali kiba la pyndonkam bakla ia ki Siren la kynthoh ki paidbah.
Kumban shu pynkynmaw ba ka liang ka sorkar lyngba u Myntri Rangbah ka jylla u Conrad K Sangma ula dep ban kdew ba la khang pyrshah ban pyndonkam ia ki Siren da ki kali bym dei bynta, lait noh tang kito kiba la shah da ka aiñ kiba kynthup ia ki kali Pulit, ki kali Pulit ba niah khmat (Pilot), ki VIP, VVIP, ki Ambulance bad ki Fire Service.
Ha Ri Bhoi District na ka liang ki Pulit kila pynlong ia ka jingkhynra na ka por sha ka por ban lap ia kum kine ki kali ba pynkheiñ aiñ bad kila ioh ruh ban weng ia kitei ki siren na kitei ki kali kit Pisa.
[Photo Credit : T7News]
