Ha ka jingpyrshang ban pynpoi ia ki skhim pynroi sha ki nongshnong shnong jong ka thaiñ ka MLA jong ka Sutnga-Saipung ka kong Santa Mary Shylla hynnin ka sngi (02/02/2026) ka la ioh lad ban leit jurip ia ki skhim pynroi bapher bapher kiba la pyntrei ha ki thaiñ Sumer kiba hap hapoh ka Saipung C&RD Block ban ioh pynthikna ba ka jingpyntrei kan long kaba iaid beit iaid ryntih bad kaba lah ban ai ka jingmyntoi ia ki paidbah nongshnong shnong ka thaiñ.
Ha kane ka jingleit jurip la synran lang ia ka MLA da u DC ka East Jaintia Hills District u Manish Kumar, IAS, u BDO ka Saipung C&RD Block u Dr. R.Pyrtuh, ki Executive Engineer (PWD) Roads, Khliehriat Division, u G. Langstang, Engineer, District Mineral Foundation Trust, u Dapmain Nongtdu, District Project Manager, District Project Management Unit (MBMA), East Jaintia Hills District, kong Pynhunlang War, ki wei de ki nongtrei, ki contractor bad nongialam shnong.
Ka jingleit jurip jong ka MLA ka long kongsan ia ki surok kiba kynthup ia u surok Sutnga-Sumer Road, ka jingshna ia ka jingkieng RCC bala pyntrei hapoh ka skhim Pradhan Mantri Gram Sadak Yojana (PMGSY) kaba pyniasoh ia ka Samasi, Moolait, Mookhain bad kiwei de ki shnong ba marjan.
Ha ka jingiakren jong ka MLA bad ki nongialam na ki shnong bapher bapher kila pynpaw ia ka rukom siang rong ia ki surok ka bym da biang bha ha ki katto katne ki bynta, ka jingdonkam ban don ki kynroh, ka jingdonkam ia ki nala ha baroh shi lynter u surok khnang ba ka um slap kan iohlad ban tuid, kila buh ka jingkyntu ia ka MLA ba kan kyntu ia ki contractor ba kin trei bha ia ka kam katkum rukom ba dei khnang ba une u surok un shan katkum ka por bala buh.
Shuh shuh ka kong Shylla ha ryngkat ki heh District kila leit ban jurip ia ka jingpyntrei ia ka iew Samasi kaba la pyntrei da ka Meghalaya Basin Development Agency (MBDA) hapoh ka MEGHLAMP project ryngkat bad ka North Eastern Council (NEC) ka MBDA kaba la pynioh pisa Rs.40.48 lak bad ka NEC pat Rs.50 lak na ka bynta kane ka projek. Ki la lap ba don ki bynta kiba la lah ban pyndep bad don pat ki bynta kiba ka kam ka dang iaid shakhmat, kumta la bthah ia ka tnad ba dei peit ba kan trei pynkloi ia ka kam, khnang ba kan ai jingmyntoi ia ki nongshong shnong. Kane ka projek ka kynthup ruh ia ka jaka pynlum ia ki mar (Collective Marketing Centre) ka ban iarap ia ki nongrep ba kin buh ia ki mar jong ki bad kumjuh ruh ban pyniaid iew ia ki mar rep jong ki.
Ha kajuh ka sngi ma MLA kala leit jurip ruh ia ki ar tylli ki jaka sumar ba kynthup ia ka Samasi bad ka Pala Health Sub-Centre, khnang ba yn lah ban pynbiang ia ki Doctor, ki dawai dashin bad kiwei de ki jingdonkam ha kitei ki jaka sumar. La jurip ruh ia ka Digital Library ha shnong Samasi kaba la pyntrei da ka ophis Saipung Blok bad ka Futsal Ground kaba pyntrei da ka skhim District Mineral Foundation (DMF).
Nalor kine ka kong Shylla kala ioh ruh ba jurip ia ka jingkieng Bri Manar ha ka shnong Samasi, ka jingshna ia ka Artificial Football Ground bad ka Anganwadi Centre ha shnong Krem Myrsiang bad leit jngoh ruh ia ka jaka ban tei ia ka Jalaphet Government College.
