Shi bynta ban pynbha shuh shuh ïa ka jingshakri sha ki paidbah lyngba ka company kali jong ka TATA, mynta ka sngi 3 tarik u Rymphang, 2026 u symbud Myntri Rangbah ka jylla u ma Sniawbhalang Dhar ula wan ban plie paidbah ïaka ‘N.G Motors Tata Authorised Service Station’ kaba don ha Khliehtyrshi Jowai By-Pass, West Jaiñtia Hills District.
Ha kane ka sngi nalor u kongsan la wan ban donlang da u myntri ka koit ka khiah bad ka kam ïalehkai u ma Wailadmiki Shylla, MLA ma Comingone Ymbon, u ma Nidamon Chullet (MD) uba dei trai jong kane ka N.G Motor, u Nitin Bhelonde (ZMCC East), u Mukul Manish uba dei u RM (North East), u Mriganka Bharali (SSM), ki MDC, ki Dolloi, ki Waheh Shnong, ki nongshahkhot sngewbha lem bad ki paidbah kiba la wan sakhi ïa kane ka prokram.
Na ka liang u ma Sniawbhalang Dhar haka jingkren ula ai ka jingkitbok kitrwiang ïa u ma Nidamon Chullet uba la shim ïa kane ka sien jam ban seng ïa ka karkhana shan kali kaba heh hapoh ka Ri-Lum Jaiñtia, ula ai ka jingïaroh ïa u ma Chullet uba la nud ban ïaid shakhmat na ka bynta kane ka kam ba bha.
Ula ong ruh ka jingplie ïa kane ka ‘N.G Motors Tata Authorised Service Station’ ka long kum ka jingplie lad ïa ki nongshong shnong ka thaiñ ba kin ïoh ïaka kam ka jam kumjuh, da kaba ong ba kane ka long ka jingsarong ïa ka jaitbynriew ban wan rah kum kane ka karkhana shna kali kaba heh.
Shuh shuh ula kyntu kum ki briew kim dei ban duh jingkyrmen haba sdang ban seng ïa kano kano ka kam, haka jingïaid kynti ki don beit shibun ki jingeh, hynrei ki dei pat ban trei shitom ïa kaba bha tam bad ha kawei ka sngi kan sa long kaba jop.
Ula kyntu kum ki nongshnong shnong kiba dei ki para jaitbynriew, dei ban don ka mynsiem kyrshan lem iwei ïa iwei, da kaba u khot ïa ki trai trok (TATA) kiba dei ki trai jylla ba kin wan ban phah pynshna ïa ki kali jong ki hapoh kane ka Authorised Service Station jong u ma Nidamon Chullet.
U ma Wailadmiki Shylla ula ong kane ka dei ka sngi sah jingkynmaw ban plie paidbah ïa kane ka karkhana, haka juh ka por ula ai khublei ruh ïa ki nongshong shnong ka Khliehtyrshi kiba la ai lad ban seng ïa kane ka kharkhana da ka jingïohi jngai jong ki ïaka lawei.
Na ka liang ki bor pynïaid jong ka Company kila pynsngew hapoh kane ka Authorised Service Station la buh ïa ki tair ki tar katkum ka juk ba mynta, khnang ban pynsuk ïa ki nongshna bad kumjuh ïa ki nongwan phah shna ïa ki kali.
La pynphuh shuh shuh ïa kane ka jingïalang da ki jingshad pliang na ki khun samla, ka jingthung ïa ki tynrai dieng ha phyllaw katei ka Service Station bad ka jingot ribon bad plie ïa u mawnongrim da u kongsan bad kiwei de.
