Ka Joint Coordination Committee of Commercial Vehicles ba kynthup ia ka East Khasi Hills Taksi Owners & Driver Association bad ka All Jaintia Commercial Vehicle Association ha ka 04 tarik Rymphang 2026 ki la leit ban iakynduh ïa u Symbud Myntri Rangbah ba khmih ïa ka tnad Transport u Ma Sniawbhalang Dhar ban iakren halor ka jingpyrshah ki kynhun Nongniah Kali kamai ka jylla ïa u Tracking Device ba thmu da ka sorkar ban pyndait ha ki kali kamai.
Haba kren sha ki lad pathai khubor hadien ba la dep kynduh ïa u Myntri ba khmih ia ka tnad transport, u Bah Wandonbok Jyrwa President ka East Khasi Hills Taxi Owners & Driver Association ki la pynpaw bad ai khublei ia ka Sorkar hadien ba u Myntri u la kular ia ki nongniah kali kamai kiba don ha ka jylla ba kim donkam shuh ban pyndait ia u tracking Device bad ia ki kot ki sla kiba iadei bad une u tracking Device kim donkam ban siew.
Nalor kata u la ong ia kiwei ki kali kamai kiba kamai inter State ka dang don hapdeng ka jingiakren la kin weng lang ia ki ne kin pyndait ia u Vehicle Tracking Devices bad ïa ki kali kamai kiba kamai ha ka jylla u Symbud Myntri Rangbah u la kular ban ym pyndait ïa u Vehicle Tracking Device.
Khatduh u la ong ba ki nongniah kali kamai ki kyrpad ïa ka Sorkar ba kan pynduna noh ia ki Company kiba na shabar wat nym khrong khajna ia ki nongniah kali kamai da kaba heh namar ka jingkhrong khajna baheh na ki nongniah kali kamai ka Subsidy pat ki ai shawei kata ka bym iahap namar dang dei ka jaitbynriew kaba dang hap kiew um dei ka jaitbynriew kaba la kiew lypa.
