Ka KSU EJHDU lyngba ka Culutural Cell ryngkat bad ka KSU Shnongrim Unit myn ha ka 3 tarik u Rymphang 2026 ka la ioh ban leit iuh kjat bad jngoh ia ka krem Kut Sutiang bad ka krem khmat Wah Tisha kaba don ha ka shnong Shnongrim, Elaka Nongkhlieh.
Ka khana ka ong ba kitei ka krem Kut Sutiang ka dei ka krem phet rieh u Woh Kiang Nangbah bad ki shipai jong u ha ka por ba ki iakhun pyrshah ia ki dohlieh ha ka por ba jur bha ka thma ha ki snem1862-1863. Ka jingthmu jong ka seng ban leit khnang sha kane ka jaka ka long ban pynsah nam ia kitei ki krem ba pawnam ba ki longdien kin tip ia ka pakit (History) ki por barim.
La donkam eh ban pynneh pynsah ia ki matti ne ki jaka don nam kiba u Blei Kynrad Nongbuh Nongthaw uba ai sngewbha ha ka mariang. Hapoh katei ka krem Kut Sutiang la lap ia ki siang jyntah kiba la rim bha bad ia ki maw ba ia syriem kum ki shuki ha kaba la iathuh ba u Woh Kiang Nangbah bad ki nongialam ki shong jingialang.
Ka KSU EJHDU halor kane ka mat ka kyntu iaka sorkar ban leh sor jamin ia kine ki jaka ba don iaka history khamtam ban pynlong ia ki, ki jaka jngoh kai pyrthei ha kaba ki briew shityllup ka pyrthei kin tip bad ki briew na kitei ki thaiñ kin im na ka kam jngoh kai pyrthei.
Ka seng halor kane ka mat kan sa buh ka jingthoh sha ki bor ba dei peit bad ruh ban wad ki lad jingiarap ban pynpawnam iakatei ka jaka bad kiwei kiwei kiba don haka District khamtam u paidbah ka District hi baroh kawei kin ioh ka kamai ja kpoh na ka kam jngohkai pyrthei.
