Hadien jong ka jingjia bthei bomb dynamite ha kawei na ki jaka tih dewiong beaiñ kaba la wanrah ia ka jingduhnoh jong ki mynsiem bad ka jingmynsaw bun ngut, na ka liang ki Pulit jong ka East Jaintia Hills District kila shim da ka Suo-motu FIR bad register ia ka case ha Khliehriat Police Station.
La register ia ka case katkum ka No.14/2026 U/S 105/118(2)/3(5)BNS r/w Sections 21/21(1) jong ka Mines and Minerals (Development and Regulation) Act bad ka Section 3 jong ka Explosive Substances Act.
Ha ka jingbud dien jong ki Pulit kila ioh ban kem ia ki ar ngut ki briew ba la suba donkti ban pyntrei ia katei ka kam tih dewiong beaiñ. Kine ki ar ngut la tip kyrteng u Forme Chyrmang, 36 snem ka rta na ka shnong Jalaphet Pordung bad uwei pat la tip kyrteng u Shamehi War, 42 snem ka rta na ka shnong Sutnga Pohwailong kiba dei baroh ar na East Jaintia Hills District.
Ia kine ki ar ngut la leit rah sha ïingbishar bad ka ïingbishar kala rai ba kin don hapoh ka Police Custody 3 sngi khnang ba ki Pulit kin ioh ban pynlong ia ka jingtohkit bniah ia ki.
Ka khubor Pulit ka iathuh ba ka jingtohkit ka dang iaid shait shait ban ioh kem sa ia kiwei de lada don kiba iadonkti lang ha kane ka kam beaiñ.
