Hadien ba ka National Green Tribunal kala khang ïaka kam tih dewïong thliewkhnai hapoh ka jylla naduh u bnai Ïaïong, 2014, hynrei dang ha kine ki sngi bala dep kala paw ba ka don ka jingtih dewïong beaiñ bad ka jingleh bymkohnguh ïa ki kyndon aiñ bala dep pynmih, kaba la wanrah ka jingjia ba sngewsih bad duh ei ki mynsiem briew naka jingbthei bom (Dynamite) shapoh krem dewïong ha shnong Mynsngat, Thangkso, East Jaiñtia Hills District.
Kumta na ka liang u Abhinav Kumar Singh, IAS, uba dei u District Magistrate ka West Jaiñtia Hills District, Jowai, ula pynmih syndon da ka hukum hapoh ka Section 163 jong ka BNSS ka ban treikam naduh ka 6 tarik mynta u bnai Rympang, 2026.
Katkum kane ka hukum kala khang pyrshang ban tih dewïong thliew khnai beaiñ, ha baroh ki jaka kiba hap hapoh ka West Jaiñtia Hills District.
La khang ruh ban shalan ne pynpoi ïa u dewïong khlem ka Challan kaba biang, ki kot ki sla lane ka laisen bala ai da ki bor ba dei peit.
Kino kino kiba pynkheiñ ïa kane ka hukum kin ngad ha ka jingshah pynshitom katkum ka kyndon 163 BNSS. Kane ka hukum kan treikam noh mardor tad haduh ban da pynbna da kumwei pat.
