Ka Meghalaya High Court ka la khot hajir ia u Deputy Commissioner (DC) Manish Kumar bad ia u Superintendent of Police (SP) ka East Jaintia Hills u Vikash Kumar ha ka 9 tarik Rymphang 2026 halor ka jingjia jingpynbthei dynamite ha kawei na ki krem dewïong beaiñ ha Mynsngat-Thangsko kaba la jia ha ka 5 tarik Rymphang 2026 ha kaba la duh noh ia 27 ngut ki mynsiem briew.
U Superintendent of Police u Vikash Kumar, haba kren sha ki lad pathai khubor, u la ong ka jingwan sha Meghalaya High Court ka dei hadien ka jingjia pynbthei dynamite ha Thangsko ha ka 5 tarik Rymphang 2026. U SP u la kyntait ban ong ei halor kane ka jingshah khot ha ka ïingkashari namar kane ka kam ka dang don hapoh ka ïingbishar.
U SP u la ong ba ka jingwad ka dang bteng, bad ka jingtohkit ka dang iaid haduh mynta bad la ioh ban kem ia ki briew bad ka jingtohkit ia ki, ka dang iaid ha ka lynti kaba dei.
Ha kajuh ka por, u Myntri Rangbah ka jylla u Conrad K Sangma u la pynbna ba ka sorkar jylla kan thaw ïa ka Judicial Inquiry Commission hapoh ka aiñ Commission of Inquiry ban tohkit ïa kane ka jingjia ha Mynsngat Thangsko East Jaintia Hills.
U Kumar u la kyntait ruh ïa ki jingkynnoh ba ki kam pyllait im ki long kiba suki, da kaba ong ba ka jingwad ka dang ïaid shakhmat wat hapdeng ki jingeh, hynrei kan dang bteng shuh shuh ka jingwad katkum ki jingai jingmut na ki tnad ka NDRF bad SDRF.
