U Deputy Commissioner jong ka East Jaintia Hills District u Manish Kumar, IAS, haba ai jingkren sha ki lad pathai khubor mynta ka sngi ha Khliehriat ula pyntip ba na ka liang ka sorkar kala lah ban pynioh jingiarap sha kiba haïing jong ki 8 ngut ki nongbylla tih dewiong kiba la khlad noh na ka jingpynbthei bom Dynamite kaba la jia ha ka 5 tarik mynta u bnai ha Mynsngad, Thangskoo.
Ula ong ba na ka liang ki bor pyniaid District jong ka East Jaintia Hills mar sien ioh jingtip ia kane ka jingjia na ka liang jong u kum u khlieh jong ka District ula phah mar mar ia ki ophisar (ADC) jong u ban leit mar mar sha katei ka jaka ba jia. U la ong ba da ka jingiatreilang bad ka sorkar jylla la phah mar mar ia ki kynhun ai jingiarap kiba kynthup ia ki National Disaster Response Force (NDRF), ki State Disaster Response Force (SDRF) bad ki Search and Rescue Team (SRT) kiba la sdang ia ka kam naduh katei hi ka 5 tarik haduh ka janmiet jong ka 9 tarik mynta u bnai.
U Manish ula iathuh ba ka jingiap kala kiew sha ka 30 ngut hadien ba la ioh jingtip ba ki don sa ar ngut kiba la khlad ha Silchar Medical College, Assam. U la ong ba ka sorkar ka dang bteng ban ai jingiarap sha ki longïing jong kito kiba la khlad noh ki bym pat ioh ia kane ka jingai jingiarap.
Ula iathuh ruh ba ki bor pyniaid District kila shimkhia halor kane ka kam tih dewiong beaiñ, ha kaba la pynlong ia ka jingthwet kaba jur ban lap ia ki jaka ba tih dewiong beaiñ bad hapoh kine ki 4 (Saw) sngi kila ioh ban kurup shibun u dewiong, ki tiar ki tar ba kynthup ia ki machine ba pyndonkam bad ruh la ioh ban kem ia ki ar ngut kiba donkti. Haduh mynta la dep ban ujor haduh 34 tylli ki ejahar bad kurup rh ia ki tiar kiba pyndonkam ha ki jaka tih dewiong beaiñ.
Kala don ruh ka jingbthah sha ka tnad District Transport Office, sha ka District Mining Office bad kiwei de ki tnad sorkar ba kin peit thuh bha bad ruh ban pynshitom ia kiba don kti ha kane ka kam tih bad khaïi beaiñ ia u dewiong.
U la iathuh ba mynta ka sngi la pynlong ruh ia ka jingialang jong ka District Task Force kaba kynthup ia ki ophisar na ka District Mining Office, ka District Transport Office, baroh ki ADM, ADC, u SP bad kiwei ki heh Pulit ban iakren bad shim ki lad ki lynti ban pynduh khoit ia ka jingtih dewiong beaiñ hapoh ka District hapoh kine ki khyndiat taiew ban wan.
U DC ula iathuh ba ka jingthwet ia kiwei de kiba donkti ha kane ka kam bad kiba dang phet rieh haduh mynta, ka dang iaid shakhmat ban ioh kem ia ki bad ia ka kyrteng jong ki yn sa pynbna paidbah ha kine ki khyndiat sngi, u la ong shuh shuh.
