Ka Hynniewtrep National Youth Front (HNYF), East Jaintia Zone, mynta ka sngi 11 tarik Rymphang 2026, ka la ioh ban ai jingïarap sha kawei ka longkmie kaba tip kum ka kong Bitisna Phawa na shnong Iongkaluh, East Jaintia Hills, kaba la ngat ha ka jingjia ba sngewsih na ka daw jong ka jingpluh ding kaba la pynjulor bad bam lut ïa ka ïing sah jong ka.
Hadien ba la ioh jingtip halor kane ka jingjia ba sngewsih, ka seng HNYF -EJZ da ka mynsiem jingïatylli bad jingïarap paidbah, ka la shim khia ban noh synniang ne ai da ki tin sop ïing kum ka jingïarap kyrkieh sha ka longkmie ba shah ktah ha kane ka jingjia pluh ïing.
Ïa kane ka jingleit ai ïarap la ïalam da u President ka HNYF-EJZ, u ma Satly Ryngkhlem, ryngkat ka jingïadonlang u Secretary ka shnong Iongkaluh bad u Waheh Dong, khlieh-kyndon ha Iongkaluh. Ka seng ka pynpaw ruh ïa ka jingsngewlem sha katei ka longkmie lem bad ka ïing ka sem jong ka.
Ka HNYF ka pynpaw ba kan bteng ban ïeng ryngkat bad ki paidbah ha kano kano ka por ba ki iakynduh jingeh bad kan trei shitom ban ïarap ïa kiba donkam ka jingiarap ha ka imlang sahlang.
