Ki Nongshong shnong jong ka Daistong, East Jaintia Hills District ha ka 14 tarik Rymphang 2026 ki la pynpaw ia ka jingpyrshah jur ia ka jingpynlong ia ka Public hearing ha kine ki bnai ba la dep bad ki la phah da ka dorkhas sha u Myntri Rangbahduh ka Ri u Narendra Modi, u Myntri ka tnad kam pohïing ka Sorkar pdeng u Amit Shah bad ruh sa u Myntri ba dei peit ia ka mariang ban dawa na ki ban pyndam noh ia Public hearing haba ia dei bad ka M/s Shree Cement Limited.
Haba iakren sha ki lad pathai khubor u wei na ki Nongshong shnong ka Daistong u bah Bunlang Phyrngap u la pyntip naduh ba ki pan NOC na ka dorbar shnong ka la don ka jingiatai halor kane bad ki nongialam shnong kim pynshai paidbah bad kim ailad ban iatai halor kane ka kam na kata ka daw kum ki nongshong shnong ki pyrshah jur ia kane namar ki iaid lait ia ki rai jong ka dorbar.
Nalorkata u la ong ki nongshong shnong ki pyrshah jur ia ka jingai NOC jong u Rangbah shnong barim bad u Secretary.
U la bynrap ba ka jingpynlong ia ka Public hearing kam long kaba beit namar kim shym la ailad ia ki ban pynsngew, ki la shah pakang lynti bad ki khlem ioh lad ban pynsngew, na kata ka daw kum ki nongshong shnong ki pynsngew sa ki tnat sorkar ba kan iarap ia ki halor kane.
Na ka liang u bah Reachingson Siangshai u wei na ki nongtrei mon sngewbha haba ia kren bad ki nongthoh khubor halor ka M/s Shree Cement Limited u la iathuh ba ki nongshong shnong ki la pynpaw ia ka jingpyrshah ia kane ha shuwa ban pynlong ia ka Public hearing bad wad hadien ka Public hearing ruh hynrei ym don ba sngap. U Bah Reachingson Siangshai u la pynpaw ba ki paidbah ka shnong Daistong ha East Jaiñtia Hills ki la ju pyrshah wat shuwa ban pynlong ïa ka Public Hearing, hynrei ïa ki jingkyrpad jong ki ym shym la sngap satia wat hadien kata ruh.
U la kynnoh ba ki bor shnong ki la shim ïa ka rai kaba donbor ban ai ïa ka No Objection Certificate (NOC) bad ban soi ïa ka Agreement khlem ka jingtip jong kiba bun ki nongshong shnong. Katkum ka jingong jong u, tang katto katne ngut ki riew shimet ki la tip ia katei ka jingsoi.
U Bah Siangshai u la kynnoh shuh shuh ba ha kane ka Public Hearing la shah tang ia kito kiba kyrshan ia kane ka projek ban rung bad ai jingmut, katba ia kiba pyrshah la khang ban kren ne ban rah ia ki jingdawa jong ki.
U la ong ba wat ia u ruh la khang ban iashim bynta ha katei ka jingialang, kaba pyni ba ka Public Hearing kam long kaba khuid bad kam shym la mihkhmat shisha ia ki paidbah.
Utei u nongtrei mon sngewbha u la pyntip ba ki nongshong shnong ki la aiti ïa ki jingthoh jingkynmaw sha ki bor bapher bapher, kynthup ïa ki dkhot ka Ïingdorbar Parliament bad ka tnad jong ka mariang, khlaw bad ka jingkylla ka suiñbneng, da kaba dawa ban pynsangeh noh mardor ïa ka jingpynlong ïa ka Public Hearing bad ban pynsangeh noh ïa kane ka projek.
Katkum ka jingong jong u, kane ka projek ka lah ban pynjulor jur ïa ka mariang, ban ktah ïa ki tyllong um, ki jaka rep, bad ban buh jingma ïa ka kamai kajih jong ki nongshong shnong ka thaiñ. U la pynpaw ia ka jingsngewkhia halor ki jaka paidbah kum ka Laitprah bad ka krem Labit, kawei na ki krem ba jrong tam ha Asia.
Nalor kata, ki nongshong shnong ki la pynpaw ia ka jingsngewkhia kaba jur halor ki jingeh ha kaba iadei bad ka jaka, da kaba kynnoh ba la iaid lait ia ka Land Transfer Act.
U Bah Siangshai u la ïathuh ruh ba ka kynhun jong u ka la aiti ïa ki jingthoh jingkynmaw sha u Myntri Rangbah, u Myntri kam pohïing ka sorkar pdeng u Amit Shah, ki heh ophisar jong ka tnad, u MP ka Shillong u Dr Ricky Syngkon, bad sha ka Meghalaya Human Rights Commission.
Ki la aiti ruh ia ki kot ki sla sha u nongialam ka liangpyrshah u Dr Mukul Sangma bad sha ki nongialam ka Voice of the People Party (VPP).
Ki nongshong shnong ki la ong ba ki dang ap ia ka jubab na ka sorkar pdeng bad ki kyrmen ba ia kane ka kam yn sa iakren hapoh ka Assembly. Ki la maham ba lada ka sorkar kam shimkhia, ki paidbah kin sa shim khia shuh shuh ban pynsangeh noh ia katei ka projek.
U bah Siangshai u la kynnoh ruh ba ha ka sngi ba pynlong ia ka Public Hearing la khang lynti ia ki surok bad la shah ban rung tang ia ki nongkyrshan projek. U la bynrap ruh ba wat u Deputy Commissioner ruh u la sakhi ïa kane hynrei u shu sngap jar jar.
(File Photo)
