Hynnin ka sngi u Myntri ka tnad bording ka sorkar Jylla u bah Metbah Lyngdoh ula wan ban plie ia u maw nongrim ban tei ia ka madan ialehkai kaba don ha shnong Bataw ia kaba la tip kum ka Lai-Phew Krem Playground Bataw bad ruh ban pynhap pyrda ia ka 4th Umsyngki Knockout Football Tournament 2025-26 ba pyniaid da ka Bataw Rumshnong Youth Club kaba dei kawei na ki club ba la rim bha hapoh ka shnong Bataw kaba la seng nongrim naduh u snem 1967.
Ia u bah Metbah Lyngdoh la synran lang da u MLA ka thaiñ u ma Kyrmen Shylla uba dei ruh u Adviser ka tnad Mining & Geology jong ka sorkar Jylla uba long ruh kum u Symbud Kongsan ha kane ka sngi, ha ka jingiadong lang u ma Lasky Rymbai, Dy. CEM JHADC, u ma Wailad Siangshai, Dy. Chairman JHADC, u Manish Kumar, IAS Deputy Commissioner, East Jaintia Hills District, u ma Fineliness Bareh, Ex-MDC, u Joinriwell Pyrtuh, Ex-MDC ka kong Stephanie Rapsang, District Sports Officer, East Jaintia Hills District bad u Dr. Tammiyaki Shylla BDO, Wapung C&RD Block bad kiwei kiwei.
Haba ai jingkren u bah Metbah Lyngdoh u la iaroh ia ka Club kaba la shakri la slem bha ia ki nongshong shnong bad ula pynkynmaw ruh ia ka jingiakren jong ki rangbah haba ki ia kynduh ia u ha kamra treikam jong u hapoh Secretariat Shillong shaphang ka jingbym don bording jong ka kawei na ki dong hapoh ka shnong Bataw kaba la tip kum ka Dong Mihsngi Bataw, ha kaba na ka liang jong u kum u Myntri ba dei peit ia ka jingsam bording ula kular ban leh shitom ban pynioh bor ding ia kane ka Dong da kaba pynrung ia ka hapoh ka skhim Additional Household Electrification Scheme.
Na ka liang jong u Waheh Shnong ma Deihok Sumer uba dei ruh u President jong ka Club ula pynpaw ka jingsngewnguh ia u Myntri uba la shimkhia ia kane ka kam bad kumjuh ruh ia u MLA ka thaiñ uba la buddien ia ki jingdawa jong ka shnong. Ha kane ka sngi la aiti ruh ia ka Memorandum sha u Myntri ban dawa pynioh 3 tylli ki Spring Chamber hapoh ka shnong Bataw.
