U MP na Shillong u Dr Ricky Andrew Jones Syngkon u ba la khlad noh na kane ka sla pyrthei ha ka 19 tarik Rymphang 2026 ha Robert Hospital Shillong, ka la wanrah ka jingduh kaba khraw bad ka jingsngewsih kaba khraw ym tang ïa ki paidbah hynrei ka long ka jingsngewsih kaba khraw ha kylleng ka Jylla Meghalaya. Da ki hajar ngut ki la ïalum lang ha ka sngi Saitjaiñ ha madan ICAR ban ai burom khadduh ïa u ha ka jingleit ontep ïa u ha Sumer.
Na ka liang ka Sorkar Meghalaya la mih khmat da u Symbud Myntri Rangbah ka Jylla u ma Sniawbhalang Dhar, la iadonlang ruh ha kane ka sngi u MP na Mizoram u Richard Vanlalhmangaiha, katto katne ngut ki MLA, ki MDC, ki nongïalam bad ki nongkyrshan jong ka Voice of the People Party (VPP), ki riew shemphang, ki nongshong shnong bad ki riew paidbah na kylleng ka jylla.
Haba kren na ka bynta ka Sorkar MDA, u ma Sniawbhalang Dhar u la pynkynmaw ïa ki kyntien ba ju kren da u Dr. Ricky ha ki jingïakren kam bad ka kynhun Myntri da kaba ong “Dei ban buh sharud ïa Party na ka bynta ban tei ïa ka jylla. U ju ong beit ba ngi dei ban buh sharud ïa ki lain jong ka party bad ban ïatreilang na ka bynta ka roi ka par jong ka jylla Meghalaya, kita ki kyntien ki sah ha ka dohnud jong nga” la pynpaw u ma Dhar haba pynkynmaw ïa ka jingïakynduh ba khadduh jong ki ha kad liengsuiñ shwa ba u Dr. Ricky un leit sha Delhi.
U la bynrap ba ka khubor jong ka jingkhlad kynsan jong u MP ka long kaba pynsngewsih shibun. “Ka jingkhlad noh jong u kam dei tang ka jingduh ïa ka ïing ka sem jong u hynrei ka dei ka jingduh kaba khraw ïa ka jylla, ka sorkar, bad khamtam eh ïa ki samla. U la long ka nuksa jong ka jinglong rit mynsiem, ka jinglong jemnud, bad ka jingaiti lut,” ong u ma Sniawbhalang Dhar.
