U President ka Voice of the People Party (VPP) u bah Ardent Miller Basaiawmoit u la ong ba ka jingkhlad noh jong u Dr. Ricky kan long kum ka jingpynkynmaw ia ka seng ba kan neh skhem ha ki nongrim jong ka bad ban iai bteng ban iakhun shakhmat.
Haba pynkynmaw ïa ka jingshah rem ha ka elekshon MLA 2018, u Bah Basaiawmoit u la ïasam ba shisien u la pyrkhat ban mih noh na ka kam saiñ hima sima. “Dei u Dr. Ricky uba ai mynsiem ïa nga ba ngam dei ban kynran dien hynrei ban ïai bteng ban shakri ïa ki paidbah bad ïa ka imlang sahlang,” u la ong.
U la batai ïa u Dr. Ricky kum u nongïalam uba phylla uba la wanrah ïa ka jingithuh ym tang ïa ka jylla Meghalaya hynrei ïa ka ri India hi baroh kawei, lyngba ka jinglong ba sngewrit, ka jinglong ba janai, ka jingshaniah, bad ka jingsngew ba skhem ïa ka jingkitkhlieh jong u.
“Ym don kyntien ban batai pura ia kane ka jingduh. U la long u bym lah ban bujli. Hynrei, ngi ngeit ba U Blei U don ka jingthmu kaba kham khraw na ka bynta ka imlang sahlang jong ngi. Ka jingkhlad noh jong u ka long ka jingtynjuh ia ngi — ka jingpynkynmaw ban ym shim sting ia ki nongialam kiba U Blei U phah ban shakri ia ngi,” la ong u Basaiawmoit.
U la bynrap shuh shuh, “Ngi sngew kumba u mawjam uba skhem hapoh ka ïing ka sem jong ngi u la hap noh. Kum ka seng, ngi trei da ka jingshai jong ki nongrim bad ka jingngeit. Ngim lah ban iapynbeit ia ki jingthmu jong ngi lada ngi kwah ban wanrah ia ka jingsynshar kaba bha.”
Ka jingim bad ki kyntien jong u Dr. Ricky ba la khlad noh — khamtam eh ka jingkhot jong u ban buh ïa ki jingïapher seng sharud na ka bynta ka jingbha kaba kham khraw — ki dang ïai bteng ban sawa jur hapdeng ki nongïalam bad ki nongshong shnong kumjuh, katba ka Meghalaya ka sngewsih ïa ka jingduh noh ïa uwei na ki nongtrei paidbah ba aiti lut u Dr Ricky Andrew J Syngkon, ong u bah Ardent.
