–11 tarik u Lber yn shong bishar biang ka NGT–
Katkum ka jingujor sha ka National Green Tribunal (NGT) da u ma Khroo L. Pariat u wei na ki nongshong shnong jong ka sor Jowai bad uba dei u President ka ‘Khooid Ia Ka Wah Myntdu’ halor ka jingshah pynjulor jong ka Wah Myntdu na ka jingpyntrei surok bad kiwei de.
Na ka liang ka ‘Joint Committee’ bala hukum da ka NGT Principal Bench katkum ka OA NO. 1271/2024 dated 4.2.2026, kane ka kynhun mynta ka sngi 23 tarik u Rympang, 2026 kaba la sdang ban leit jurip ïa ka Wah Myntdu naduh ka por 11 shiteng mynstep.
La sdang ban leit jurip naduh ki bynta jong ka kshaid Tyrshi, ki bynta jong ka liar kam-kam kaba dang pynshna ïa ka jingkieng, ki hali ha Pynthor neiñ kiba shah ktah, ha Jingkieng Pamblah, ki bynta ka Wah Mynkrem, ha jingkieng Treïongriang bad haka jaka ba noh ïa ka khyndew hynrei hangne ka Joint Committee kam shem ka ïohi ïaka jingbuh ka kyndew bad kaba bun hi ka khyndew la bret pathar sha ki bynta ka Wah Myntdu.
Ka ‘Joint Committee’ kala sakhi ruh ïa ka rukom tih bad thet pathar ïa ka khyndew sha ki bynta ka Wah Myntdu na ka jingpyntrei surok, ha kaba la bthah ïa u Contractor bad ka tnad PWD ba kin pynlum pynlang ïa katei ka kyndew bala theh beaiñ bad ban ker ïa ki kynroh ban lait na ka jingtwa kyndew.
Ïa kane ka jingleit jurip la khot pynlong lyngba ka Meghalaya State Pollution Control Board, ha ryngkat ka jingdonlang u (Nodal Officer) uba dei ruh Member Secretary ka MSPCB Dr. G.H Chyrmang, MFS, u Er. Abhay Kumar, CWES General Secretary Brahmaputra Board, ka CEO Jowai Municipal Board ka kong D.V. Lyngdoh (MCS), u nongujor ma Khroo. L. Pariat, ki ophisar na ka tnad PWD, Water Resource, ka Construction Company bad kiwei de.
Na ka liang u Dr. G.H Chyrmang ula ong kane ka kam ka hap hapoh ka suo moto cases bala ujor da u ma Khroo L. Pariat, kumta la bthah da ka NGT ban thung ïa ka ‘Joint Committee’ kaba kynthup na ki Department bapher bapher naduh ka Meghalaya State Pollution Control Board, Ministry of Jal Shakti, PWD, PHE bad JMB da kaba khot lang bad u nongujor.
Ula pyntip ba kane ka Committee kan peit ïaki kam bala dep leh namar ka jingshong bishar ka NGT ïa kane ka kes kan long haka 11 tarik u Lber, 2026, ula ong kin sa lum jingtip shuh shuh ïa ki jingjia ban wan na ka bynta ban ai ïaka Report sha ka NGT.
