Ka District Magistrate (DM) jong ka East Khasi Hills District kala pynmih ia ka hukum hapoh ka kyndon 163 jong ka Bharatiya Nagarik Suraksha Sanhita (BNSS) kaba la khang prshah ia ka jingiaid jong ki kali heh kiba kit palat ia ka 9 ton ka jingkhia ban iaid lyngba ki surok kiba don hapoh u pud u sam jong ka East Khasi Hills District.
Lada lap ia kino kino kiba pynkheiñ ia kane ka aiñ kin ngat ha ka jingpynshitom katkum ka kyndon aiñ 223 jong ka Bharatiya Nyaya Sanhita (BNS).
La hap ban pynmih ia kane ka hukum namar ba la ioh jingtip ba ki don ki kali heh kiba kit palat ia ka 9 ton bad ki iaid lyngba ka surok Mawmaram-Nongthliew-Mawlyndep bad kane kala pynsniew bad pynjot ia u surok bad ka buh jingma ruh ia ki nongshong shnong bad ia ki nongleit nongwan namar ka jingkhim jong u surok.
Kane ka hukum kan treikam noh mar mar bad kan neh haduh ban da pynmih da kumwei pat.
