Hadien ba ka seng KSU-Narpuh Circle, East Jaiñtia, ka la ioh jingtip ba ka don ka jingkhlong maw beaiñ ha Wah Malidor da ki nong Assam, kaba dei hapoh u pud u sam jong ka jylla Meghalaya, kumta ki dkhot ka KSU-Narpuh Circle ha ka jingialam u President u Phanuel Tongper bad General Secretary Yooni Muksor, mar mar kila hiar leit jurip mynnin ka 24/02/26 sha katei ka jaka ha kaba la lap shisha ia kane ka jingkhlong maw beaiñ da ki dkhar Assam kiba don da ki spah ngut kiba pyndonkam ruh da ki puhshilum (JCB) bad pynkit da ki phew tylli ki truck sha Assam.
Kane ka jingleh jong ki, ka long kaba pynjot shi katdei eh ia ka mariang bad ia ka Wah Malidor, kumta ka seng kala pynsangeh bad beh krad syndon ia ki phew tylli ki truck bad ki nongtrei kiba dei na Assam. Haba tohkit bniah na kitei ki nongtrei kiba don ha katei ka jaka, mano ba pyniaid bad ai bor ia ki ban khlong ne tih ia kine ki maw ha Wah Malidor, kila iathuh ia ka kyrteng kum u Lisu Terang uba dei u Karbi, ba sah ha Shnong Malidor Meghalaya.
Haba iakren bad utei u nong Karbi lyngba ka phone, u ong ba um don ha shnong bad la tohkit ia u, la u ioh jingbit ne ka Environment Clearance kaba nangno ban khlong maw beaiñ kumne. Na ka liang jong utei u nong Karbi, ula ong ba um shym la don kino kino ki kot ki sla kum ka permission ne clearance na kano kano ka department, kumta ka seng kala phah ia u ban sangeh ia kane ka kam bad maham ruh lada ka dang bteng ka seng kam banse ban leh da kaba tyngeh. Ha ka jingiakren shuh shuh la sngewthuh ba u don ka jingiadei bad ki briew jong ka tnat Forest kiba dei khmih (Jurisdiction) ia katei ka jaka.
Shuh shuh ka seng ka lyngngoh, ba mynta lah 3 bnai kynthih kane ka kam beaiñ kala iaid katkum ka jingtip haba tohkit, na ki Staffs Forest kaba don ka Beat Office ha shnong Ratacherra, bad Ranger Office ha Umkiang, kim iohi ia kane ka kam beaiñ kaba hap hapoh ka Jurisdiction jong ki. Halor kane ka seng ka suba jur ba ka lah ban don, ka jingiadon kti lang ki briew jong kitei ki tnat Forest bad une u Karbi uba pyniaid ia kane ka kam khong maw beaiñ.
Ha kawei ka liang ka seng ka bynniaw ia kane ka jingkhlong maw beaiñ, kaba lah ktah shi katdei ia ka mariang, ia ka Wah Malidor kiba don ki dohum khamtam kan ktah ia u pud u sam jong ka jylla namar ka Wah Malidor kala long kum ka Natural Boundary hapdeng ka jylla Assam bad jylla Meghalaya. Namar lyngba kane ka jingkhlong maw beaiñ, ka Wah Malidor kaba heh ha ki por lyuir kan sa kyntur pud shuh shuh sha ka phang jong ka jylla.
Haba pynkut ka seng, kala dawa ia ki bor ba dei khmih na ka JHADC, na ka State Forest & Environment Department bad kumjuh na ka District Administration (DC Office) ban tuklar mardor katkum ka aiñ ia kiba donkti halor kane ka kam.
