Ki trai trok na Jaiñtia Hills kiba kit ïa ki mar na ki Kharkhana Dewbilat, mynta ka sngi Thohdieng kila lum ïa ka jingïalang ha 4 mer Mihmyntdu ban ïakren pynbeit ha kaba ïadei bad ki kam jong ka seng Jaiñtia Hills Truck Owners’ Association (JHTOA).
Hadien kane ka jingïalang u ma Balen Thubru ula ong da kawei ka sur kila shim ïaka rai ban pynlong ïaka jingjied President (JHTOA) bad ki nongkitkam thymmai ha ka 2 tarik u Lber, 2026 (Monday) ha ophis ka Kur Phawa-Siangshai-Papiah-Lyngdoh Phawa kaba don ha Khliehwah Sahsniang, Ïalong West Jaiñtia Hills District.
Kino kino kiba kwah ban ïakhun ïa ka kam President ki lah ban pynpoi ïa ki Application ha u Secretary bala jied haka por 9 baje ha ryngkat ki Polling Agent jong ki bad ka jingïathep vote kan sdang naduh ka por 11:00 mynstep tad haduh ka por 4 baje nohphai sngi bad ia kane ka Election yn pynïaid da ki Volunteer jong ka Shnong Ialong, West Jaiñtia Hills District, la ong u ma Balen.
Na ka liang u ma Balen Thubru u kwah ban pynshai paidbah ha kaba ïadei bad ka Election kaba thmu ban pynlong haka 9 tarik mynta u bnai, hynrei la hap ban pynsangeh shwa hadien ka jingïakynduh bad u President ka JHTOA bad ban ïakren halor ka jingpdiang ïa ki Renewal hapoh ka seng JHTOA, hynrei utei u President la pan por shi taïew bad phah syndon da ka jingthoh sha DC ba ym lah shuh ban pdiang shuh ïa ka Renewal, kumta na ka liang ki trai trok kila pyrshah jur ïa kane ka jingleh jong u. Shuh shuh ula kynnoh ïa ka jingkam utei u President halor ka Constitution ka seng da kaba pynsngew kiba bun na ki nongñiah trok kim pdiang ïa katei ka jingkren.
Halor kane ka jingjied nongkitkam thymmai u ma Balen ula wer ïa baroh da kaba ong ‘manla ki trai trok ki don ka hok ban wan thep Vote’ naduh kiba don ïa ki trok 6 shaka haduh ki 16 shaka ban ïashim bynta lang.
Ha ka juh ka por la kyntu ïa u President ma Biangshwa Shylla ba un wan shakhmat ban ïakhun ïa kane ka kam President, la u dang bit ban shah jied ne em ha kane ka kam hynrei ka rai ba khadduh ka shong ha ki paidbah bad ki nongïakhun kin wanrah lang ïaki kot kali original kum ka Registration Certificate (RC) ym shah ïa kino kino ban wan rah da ki kot dustabit thied kali, la ong u ma Balen.
