Ka seng ki nongshong die jingdie ha Iawmusiang Jowai kaba la tip kum ka Jaiñtia Tribal Trader Association (JTTA), ka la pynlong ia ka jingialang (General Meeting) hynne ka sngi saitjaiñ 28 tarik Rymphang, ha Tpep-pale Community Hall, Jowai, ha ka jingiadei bad ka Iawmusiang Shopping Complex kaba la jan ban dep mynta, na ka bynta ban pyrkhat ia ki nongshong die kiba dei hok ban ioh ia ki dukan ne stall ha kane ka complex ne ia kiba don ka permit.
Na ka liang u President ka seng u ma Iatha Najiar, u la iathuh ba katei ka Shopping Complex ka don 300 tam tylli ki stall ne ki dukan, hynrei ki nongshong iew jong ka Iawmusiang ki don haduh kumba 600 tam ngut kiba don ia ka Permit, ha kaba kane ka lah ban wan rah ia ka jingeh kaba khraw.
U la ong ruh ba ha ka jingiadei bad kane na ka liang ka seng la bun sien ka la dep ban thoh shithi sha ka ophi jong ka Jaiñtia Hills Autonomous District Council (JHADC), hynrei haduh mynta ym shym la ioh ia ka jubab tang shisien ruh halor katei ka jingeh.
Kumta ha kane ka jingialang mynta ka sngi na ka liang ki nongialam jong ka JTTA ryngkat bad ki nognshong die ki la rai ban ai por haduh ar taiew ia ka JHADC kaba dei peit ia ka iew ka hat, ban ai ia ka jingbab halor ka jingduna jong ki jaka shong die hapoh katei ka Complex. Lada na ka liang ka JHADC kam ai ia ka jubab na ka liang ka JTTA kumjuh ruh ki nongshong die kin mih paidbah ban leit sha ka ophis jong ka JHADC na ka bynta ban ioh ia ka jubab kaba shai.
