U Symbud Myntri Rangbah ka jylla u Bah Prestone Tynsong ha ka 3 tarik Lber 2026 u la plie paidbah ia ka Laitkyrkhong Sub Centre bad ka Indoor Sport Hall.
Ha kane ka jingplie pyrda ia ka Laitkyrkhong Sub Centre bad ka Indoor Sport Hall la ia don lang da u MLA ka Mawkynrew u Bah Banteidor Lyngdoh BDO Mawkynrew, ki ophisar na ka tnad ka koit ka khiah ki ophisar na ka tnad ialehkai, ki nongshong shnong ka laitkyrkhong nalor kiwei kiba la shah khot sngewbha.
Haba kren ha kane ka sngi u MLA ka thaiñ u Bah Banteidor Lyngdoh u la khublei ia u Symbud Myntri Rangbah ka jylla u bah Prestone Tynsong, ki ophisar ka tnat ka koit la khiah, ka tnat ialehkai, ki sordar Shnong bad ki nongshong shnong
U la ong ba kane ka sub Centre ki la ia kren la bun ki bnai ban ioh plie noh bad kumjuh ruh ia ka Indoor Sports hall ba mynta ki la ioh ban plie na ka bynta ki Paidbah ba kin ioh ban pyndonkam ia ka.
Nalor kata u la pynpaw dang bun ki sub Centre kiba kin sa plie shen ha ka constituency, ka koit ka khiah ka dei ka spah bah na kata ka daw na ka liang ka jong u bad ka sorkar ki shim ia ki lad ban pynjan ia ki jaka ai jingsumar sha ki Paidbah.
U la ai jingiaroh ia ki Nongshong Shnong ka Laitkyrhong kiba thrang ban wan sha Khmat ban ai jingsumar, u la ong ba ha kane ka jaka don kam ia shuh shuh ia ki nos khnang ba ki Paidbah kin ioh ia ka jingsumar kaba bha.
Shuh shuh u la bynrap ha ka jingshisha ki la dei ban plie ia lai tylli ki project hynrei namar ka jingsah sa kato katne ki bynta jong ka madam Football kim pat plie bad shen kin sa leh ia kane ia mynta tang ar tylli ki project ba ki la ioh ban plie kata ka Sub Centre bad ka Indoor Sports Hall.
Khatduh u la pynpaw ka Hall ka dei ban kilan met pyndonkam hok ia ka, sumar khuid bad buh briew ban peit ia kane ka jaka. Kaba phi lah ban pyndonkam ia ka. U la ong ba kum u Shakri uba phi la thung ngan iai shakri ryngkat ka jingiatreilang bad phi ki paidbah.
U Symbud Myntri Rangbah u bah Prestone Tynsong u la ong ka jingplie ia kine ki artylli ki Project kan long ka jingkyrkhu ia ka Shnong bad ka thain hi baroh ka wei. U la ai khublei ia u Bah Banteidor uba la wan rah ia kine ki skhim bad kyntu ia ki Paidbah ban ia treilang na ka bynta ka jingmyntoi jong baroh.
Nalor kata u la ong ha kine ki 8 snem ka Sorkar MDA ka la synshar, ka sorkar ka la leh ia bun ki kam ban pynurlong ha ki Constituency ha ka jylla baroh ka wei. Mynta ngi iohi ia ka jingshitrhem jong ki Longkmie kiba don hapoh ka SHG, ha u 2018 ha ka jylla ki SHG ki don tang 4 hajar tylli hynrei naduh u snem 2018 haduh mynta ka la poi shaduh 50 hajar tam ki SHG. Ka pisa kaba la mang ka la poi da ki hajar tyngka, shuh shuh ka sorkar ka la iateh bad ki Bank ban ai ram sha ki SHG bad kumba long mynta ki Paidbah ki la iatreibha.
Shuh shuh u la kyntu ia ki longkmie ban pynkhlaiñ shuh shuh namar ka sorkar ka don ryngkat, ka sorkar lyngba ka Mang pisa ka la kyntiew shuh shuh. Pynheh ia ka jingtreikam jong phi ha ka kamai lyngba ka SHG. Trei shitom namar lyngba ka SHG phin ioh ia ka jingmyntoi ha ki bynta baroh.
Halor ka memorandum ba la aiti da ka Shnong u Bah Prestone u la ong ba u sngew lehrain ban iohi ia ka jing pumpum jong ka surok, hynrei da ka jingiatreilang kum u Myntri un sa pynurlong noh kloi, haba ia dei bad ka jingbiang ki nong sumar ka tnat kan sa phah ia ki jingdonkam bad kyrmen ba kin lah ban pynurlong ia ka. Haba ia dei bad ka Secondary School u bah Tynsong u la ong ba un iatreilang bad u MLA ban ioh pynrung ia ki lad jingïarap na ka bynta ka jingdonkam jong ka skul.
