-Hashwa u Nailar yn pynïoh ïa ka Jaiñtia Anthem: Sniawbhalang Dhar-
Ka National People’s Party (NPP), West Jaiñtia Hills District Unit mynta ka sngi Balang kala pynlong ïa ka jingkynmaw burom ïa ka jingdap 10 snem ka jingkhladnoh u Purno Agitok Sangma, u nongseng ïa kane ka kynhun seng saiñ hima sima (NPP) bad uwei na ki Speaker barim ka Lok Sabha, ha ka jingïalang bala pynlong ha Chutwakhu Indoor Sports Hall, Jowai.
Ha kane ka sngi leh burom la wan ban donlang naduh u Symbud Myntri Rangbah ka sorkar jylla u ma Sniawbhalang Dhar, u myntri ka koit ka khiah bad uba dei ruh u Preisident ka NPYF State Unit u ma Wailadmiki Shylla, ka kong Santa Mary Shylla, u CEM ka JHADC ma Thombor Shiwat, ma O. Lamin MDC ba shusieh, ki MDC, ki nongkitkam jong ki Unit bapher bapher ka NPP hapoh ka West Jaiñtia bad kiwei kiwei de.
Haba ai jingkren u ma Sniawbhalang Dhar ula ai khubei kyrpang ïa baroh ki nongkitkam jong ka Party kiba la poi sha kane ka jingïalang kynmaw burom, da kaba u pynsngew ba u Purno Agitok Sangma u dei u briew uba buh hakhmat ïa ki paidbah katba ïa ka kyrdan (position) u buh hadien. Kum u MLA u kyntu ïa baroh lang ban bud ïa ki nuksa babha jong u Purno da kaba bud ïa ki dienjat jong u ban kyntiew ïa ka jylla bad ïa ka thaiñ shatei lam mihngi hi baroh kawei.
Ha ka juh ka por u kyntu jur kum ka jaitbynriew dei ban long kiba tylli lang kawei khnang ban im ka riti ka dustur bad ka jinglong tynrai ba kyrpang.
Ula pyntip ruh kum u nongmihkhmat jong ka Ri-Lum Jaiñtia u don ka thong kaba hakhmat eh kata ban pynïoh noh ïa ka ‘Jaiñtia Anthem’ bad ïa kane ka jingthmu yn sa pynurlong hashwa u bnai Nailar (August) mynta u snem da ka jingïatrei lang baroh ki MLA ka Ri-Lum Jaiñtia.
Shuh shuh ula pyntip kan don ka jingïalang naduh ki MDC, ki nongïalam kur bad ki riew rangbah kiba ha khmat eh na ka bynta ban pynbeit ïa ka jinglong ka Kur ka Jait hapoh ka Ri-Lum Jaiñtia, kumjuh ka jingpynbeit ïa ki jaka ki puta bad ban pynbeit noh ïa ka rukom pynïoh tulop ïa ki nongtrei ka JHADC kaba long manla u bnai.
Ïa ka jingïalang ha kane ka sngi la pynïaid da u ma E. Suting, Organizing Secretary, ka jingduwai na u MDC ma R. Lamare, ka jingrwai kyrpang na u Eladmitre Dkhar bad ka jingkren ai khublei na u bah D. Kharjana, General Secretary, NPP, WJH Unit. Kum ka dak ban kynmaw burom la leit ban buh syntiew kumjuh haka dur ïa u (L) Purno A. Sangma.
