Kum shibynta ban pynneh pynsah ia ki rukom rep mynbarim, ka Jaintia Hills Development Society (JHDS) mynta ka Sngi 23-02-2022 ka la plie paidbah ia ka ïing bad Kor tylliat Krai (Millets Processing Unit) ha ka shnong Samanong, kaba la wan ban plie da u President ka KHUBLEI Germany u Sir Garhard Albert ha ryngkat ka jingiadonlang u Director ka JHDS u Rev. Fr Manbha Pakem bad ki staff ka JHDS.
Kumban shu kdew hangne, ka Shnong Samanong ka dei kawei napdeng ki katto katnne ki shnong kaba dang pynneh pynsah ia ka rukom rep ia u Krai ha Rilum Jaiñtia uba long u wei na ki jingthung ba bha tam u ba la sdang ban duh jait. Ha kine ki snem ba la leit ka Jaintia Hills Development Society ka la trei borbah ban kyntiew ia ka rep ka riang ha rilum Jaiñtia bad ha u snem 2019 la shem ba don tang 3 tylli ki longïing kiba dang rep ia u Krai ha kane ka Shnong da ka jingthmu ban ai bam sniang.
Kumta khnang ban pynkhe im biang ia une u symbai barim, ka JHDS ka la trei borbah ban pynshlur ia ki nongrep lyngba ki jingai jinghikai bapher bapher khamtam eh la hikai ia ki nongrep ban pyndonkam ia une u jingthung da kaba shet cake. Lyngba ka jingbudien bad jing pynshlur ka JHDS, haduh mynta la don haduh 20 tylli ki longïing kiba sdang biang ban rep ia une u jingthung mynbarim.
Shuh shuh, khnang ban kyntiew ia ka ioh ka kot jong ki nongrep, ka JHDS ka la synniang da ka kor tylliat krai hapoh ka jing khmih jong ka SHISUR Self Help Group da ka jingthmu ban pyndonkam ia une u jingthung ba la jan duhjait da kaba shna jingbam ha kiba bun ki rukom.
Ha kane ka sngi la ioh ia ki jingkren pynshlur na u Director ka JHDS bad na u Kongsan u Sir Garhard Albert kiba la pynshlur bad ai mynsiem ia ki nongrep ban treishitom ban iaid shakhmat ha ka ban pynbun shuh shuh ia ka jing pynmih ia une u jingthung. U Fr. Manbha Pakem u la kular ruh ba ka JHDS kan iaibteng ban kyrshan ia kitei ki longïing khamtam eh ha ka ban pyniaidiew ia kine ki jingbam ba la shna na u Krai.
