Ha kane ka sngi Nyngkoong (Monday) la pynlong ia ka Joint Inspection hapdeng ka ophis SDO Amlarem, ka Co-Ordination Committee on International Border (CCIB), ki shipai BSF bad ki trai jaka naduh Dawki haduh Amjalong na ka bynta ban leh survey ban ker sainar shiah (fencing) ha khappud bad ka Ri Bangladesh.
Hadien jong kane ka Joint Inspection na ka liang u General Secretary ka (CCIB) ma Kmen Myrchiang ula ong la sakhi dalade hi ba ka jingker fencing la leh na u pilar haka jingjngai kaba 150 Yard bad lada kane ka rukom leh ka ïaid kumne, kan long ka jingduh nong kaba khraw eh ïa ki paidbah kiba im ja na kane ka kam ha kaba kin duh ei ïa ki jaka ki puta jong ki.
U la ong ha ki bynta ka Riat Jalong shakhmat ka fencing ka ïaid na shaneng ka surok Dawki Muktapur bad kane ka surok ka ïaid pynban shabar jong ka fencing, la pyntip ruh kin buh da ka khyrdop (Gate) bad ki paidbah kin hap ïaid lyngba kata ka Gate bad kane ka long ka jingduh kaba khraw eh ïa kiba bun ba lang ha ka ïaid ka ïeng.
U la kynnoh jur halor kane ka jingleh donbor jong ka sorkar khlem da kynjoh ktien shwa na ki trai jaka bad ïa ka jingker sainar shiah dei ban leh da kaba pynbeit shwa ïa u pud u sam namar ïa kitei ki jaka rep kila don shwa shapoh ka jylla naduh ka por ba pynkha ïa ka ri Bangladesh, hynrei mynta kila hap shabar ka jingker.
U ma Kmen Myrchiang ula kren shai ba ka CCIB ka pyrshah jur ïa kane ka jingleh kaba ker sainar shiah 150 Yard na u pilar bad baroh ki jaka rep kiba la buh da ki riew tymmen kin duh noh bad hap lut shapoh Ri Bangladesh.
Halor kane ka kam ula ong ba ka CCIB kan khot ïa ka jingïalang ban ïakren sani bha, khnang ba ki trai jaka kim dei ban duh ïa ki jaka puta jong ki bad ki dei ban hap beit shapoh ka jylla.
Ula kynthoh ba don ki trai jaka kiba la dep ban shim ïa ka bai khyndew na ka sorkar bad kane ka jingleh jong ki, ka long ka jingleh arsap namar ka CCIB kam pat ai rai satia sha ki trai jaka ban die ïa ki jaka ki puta, da kaba u ong ruh don kiba leh sop sop ïa kane ka kam kaba la pynsniew ïa ka jingmut jingpyrkhat, ka pyntlod bad pynsngewsih kumjuh ïa ka CCIB.
Haba pynkut ula kren shai ba ka Co-Ordination Committee on International Border (CCIB) kam pyrshah ïaka jingker sainar shiah, hynrei ka kwah ba ka sorkar ka dei ban pynbeit shwa ïa u Pud u sam uba biang.
