U Myntri ka tnad Food & Civil Supplies & Consumer Affairs ka Sorkar jylla u Bah Methodius Dkhar ha ka 12 tarik Lber 2026 haba kren bad ki lad pathai khubor u la pyntip ba ka tnad Food & Civil Supplies ha ryngkat bad ki ophisar na ka IOCL ki la shong ia ka jingialang na ka bynta ka jingdonkam ki Gas Cylinder LPG hapoh ka jylla.
U la pyntip ba ha kine ki khyndiat sngi ka la don ka jingpynsngew ba ka jing supply ia ki Cylinder LPG ki duna bad ki paidbah ki la sdang ban khih khohreh bad khuslai jingmut.
Nalor kata u la pyntip ba ki paidbah kim dei ban tieng ban ia khohreh ban book klumar ia ki Gas Cylinder namar haduh mynta ka Sorkar ka pyntikna ba ka stock jong ki Gas Cylinder LPG ki biang haduh kine ki sngi.
Shuh shuh u la ong ba ka Sorkar ka la buh ia ki Committee bapher bapher ba la khlieh da u Chief Secretary haba iadei bad ka State Monitoring Committee bad ki District Committee ba la khlieh da ki Deputy Commissioner ha ki District bapher bapher ban peit ia ka jingsupply ia ki LPG bad ki gas Cylinder.
Khatduh u la ong ba ki paidbah kim dei ban tieng bad khuslai bad kim dei ban book klumar ia ki Gas Cylinder bad u kyntu ruh ia ki Agencies bapher bapher kiba supply ia ki Cylinder Gas ba kim dei ban buhrieh ia ki Gas Cylinder bad ban pynduna ki supply sha ki paidbah la ong u Myntri ka tnad food Civil Supplies & Consumer Affairs u Bah Methodius Dkhar.
