Ia ka prokram DC Connect kaba dei na ka bynta ki shnong kiba hap hapoh ka Thadlaskeiñ C&RD Block la pynlong hynnin ka sngi (12/03/2026) da ki bor pyniaid District jong ka West Jaintia Hills ha ophis treikam jong ka Thadlaskeiñ Block, ha Mukhla, halor ka jingthmu ban ailad ia ki nongmihkhmat na ki shnong bapher bapher ban iakren markhmat bad ki nongtrei jong ki tnad treikam bapher bapher bad ban wan rah ia ka jingeh jong ki shnong ki thaw jong ki.
Haba ai jingkren ha kane ka sngi u Deputy Commissioner ka West Jaintia Hills District u Abhinav Kumar Sing, IAS u la iathuh ba kane ka DC Connect ka dei ka lad ba ki nongmihkhmat na ki shnong bapher bapher kin ioh ban ia kren ne wanrah ia kino kino jingeh hakhmat jong ki nongtrei sorkar na ki tnad bapher bapher. U ong, ba ki lah ban ai ruh ia ki jingai jingmut bad ki jingsngew na ki shnong jong ki. Kane ka lad kan iarap ruh ia ki bor pyniaid District ban tip ia ka jingdonkam jong ki nongshong shnong. U la ong ruh ba lada don kino kino ki bynta kiba donkam ban pyntip sha ka Sorkar kane ka DC Connect kan long ka lad ban ai jingiarap bad jingkyrshan ia ki shnong ki thaw.
Kumta u Abhinav ula kyntu ban pyndonkam hok ia kane ka lad bad kular ban trei ne lem mardor ia kano kano ka kam kaba la wanrah.
Ha kane ka prokram ki nongmihkhmat na ki shnong bapher bapher kila iohlad ban buh rah shibun ki kam bad buh ruh ki jingkylli, ha kaba ki nongtrei na ki tnad sorkar bapher bapher kila ioh ban ai jingshai ia ki.
Kiwei de kiba la don lang ha kane ka prokram ki long i Addl. DC kong B. Blah, MCS, u BDO ka Thadlaskeiñ u Dr. Hemonmi Niang, i Asstt. Commissioner LBR Marak, MCS bad ki heh jong ki tnad kum na ka Health, Soil & Water Conservation, Education, ICDS, Supply, PWD, PHE, MeECL, Agriculture bad na kiwei de.
