Ka Jaiñtia Career Coaching Centre (JCCC) kala pynlong ïaka 2nd Jaiñtia Cultural Festival-2026 mynta ka sngi 13 tarik u Lber, 2026 ha Mihmyntdu Moowamon MTC hajan ka ophis DTO Jowai, shi bynta ban pynriewspah ïaka jinglong tynrai jong ka Bri u Hynñiewtrep hapoh ka jylla halor ka phang kaba ong “Meghalaya Culture & Traditions”.
Ha kane ka prokram la pynlong ïaka jingïakop tynrai ha ki saw bynta kiba kynthup ïaka Jingïakop rwai Tynrai, ki Jingïakop Shad Tynrai, ki Jingïakop kyntip (quiz) bad ka jingïakop dro dur. Nalor kine la don ruh ka Poetry Recitation ban ailad ïa ki khynnah.
Naka liang u ma Bishar Samayang Asstt. Centre Head, JCCC haka jingkren lamphrang shaphang ka JCCC ula pynsngew bala sdang ïaka jingtreikam ba pura haka snem 2021, ha ryngkat ka jingtreilang ki katto katne ki paralok na ka bynta ban ai jingshakri kaba bha tam sha ki samla pule jong ka District lyngba ka jingïakhun ha ki ‘Competitive Exams’ bapher bapher kum ki DSC, MPSC, SSC, Banking, kumjuh ki English Spoken Class nalor kiwei de.
Ula ong mynta ka JCCC kala bteng ban ai jingshakri ym tang ha ki Competitive Exams, hynrei nalor kiwei de kum kine ki jait prokram ban ai lad ïa ki samla ban pynpaw pyrthei ïala ki sap ki phong jong ki haka riti ka dustur.
Da kaba pynsngew ba ka Ri-Lum Jaiñtia ka long kaba kyrpang ha ka jinglong tynrai naduh ki jingtei nam, ki mar ki mata, ka riam ka beit, ki Khlawait, ki dustur lehñiam bad kiwei kiwei de kiba lah ban pynsah nam ha ki pateng ban wan. Ula pyntip haka sien kaba lai ïa kane ka Cultural Festival yn pynlong ha East Jaiñtia Hills District.
U kongsan jong kane ka sngi u Sujit Kumar Sahoo, Asstt. Director (EMP) & SREO, Jowai Govt. of India ula ai ka jingïaroh ïa ka Jaiñtia Career Coaching Centre (JCCC) kaba la shim ïa kane ka sienjam ban pynlong kum kane ka Cultural Festival na ka bynta ki samla.
Ula ong baka Ri-Lum Jaiñtia ka long kaba riewspah bha haka Riti ka Dustur kaba pyni ïa ka jinglong tynrai ha kiba bun ki bynta naduh ka rwai ka siaw bad ka shad ka kmen, ula ong haduh 35 percent ki samla ka Ri India kiba don haka rta 19-35 snem bad lyngba jong ki kan long ka lawei jong ka ri.
Ban poi sha ka thong u Kumar ula kyntu ïa ki khun samla ban long kiba ïar haka jingmut jingpyrkhat, kiba trei shitom, kiba don ka akor ka burom, kiba minot, kiba len lade bad kiba pyndonkam hok ïa ka sap ba ki don.
Ka kong B.L. Mawnai, District Employment Officer WJHD kala ong ba kane ka Festival kan ïarap ban pynkiew ïa ka riti dustur la jong, kala ai khublei ïa ka JCCC kawei na ki slem ai jinghikai ïa ki samla pule ban ïakhun ïa ki exams bapher bapher, kala kitbok ïa kane ka Centre ba kan dang kiew shaphrang ha ki sngi ban wan.
Ïa ka jingïalang ha kane ka sngi la pynïaid da ka samla Rishadaka Biam, ka jingrwai pdiang na ki samla pule ka JCCC (2025-26 Batch), katba ïa ki kyntien ai khublei la ïoh da ka Fenisa Talang.
Hadien kane la pynlong ïa kitei ki jingïakop tynrai ha kaba la sam da ka song pisa sha ki nongjop ha ki kyrdan bapher bapher. Katba haka por janmiet la don ka prokram pynbyrnia ïaki nongwan sha kane ka Festival.
