U Waheh Shnong barim ka Ksehrynshang, West Jaiñtia Hills District ma Malbi Timung, ula pynshai halor ka jingkynnoh ka HITO ba pyntrei torti ïa ka skim JJM hapoh ka shnong.
“Ngam tip ba ki don kita ki seng HITO hapoh ka shnong, hynrei ki dei pynban ki nongshong shnong hi” ong ma Timung.
Ula pyntip ba hashwa ban aiti ïa katei ka skhim bala pynïoh da u MLA ka 1-Nartiang, la phah pyntrei ïa ka da u ma Hed Marya uba dei u nonghong shnong ka Nartiang bad ka Committee kala rai ban aiti sha u ban pyntrei ïa ka kam.
“Kito ki dkhot ka HITO kiba kynnoh pyrshah ïa kane ka jingpyntrei ïa ka skim, ki dei ki dkhot jong ka Sanad Shnong bad kiba treilang ha kato ka por na ka bynta ki kam shnong, hynrei haba ki kup da kawei ka uniform ki kren da kumwei pat” la ban u ma Timung.
Kum u Waheh Shnong ba rim uba trei na ka bynta ki kam shnong ha kata ka por ba pyntrei ïa ka skim, ula pyrshang ban trei shitom met bad mynsiem ban pynïaid shakhmat ïa ka kam shnong, khlem da don bynta ha ki kam bamsap namar ïa kane ka kam la rai ban pyntrei da ka shnong bad hashwa ban pyndep ïa ka skim la lum ïaka Dorbar Shnong ha Primary School Ksehrynshang.
Kum u nongïalam shnong barim ula pynrem ïa kiba kynnoh donkti ha kaba bam pisa, da kaba ong ‘lada nga shim pisa kin sngewbha ban wad jingtip bad lada ki lap ngam ai ar shah sha ki’.
Ula pynpaw ka jingsngew sarong ba ka shnong Ksehrynshang kala ïoh um ar sien lai sien haka shi taïew bad la pynpoi um manla ka sngi shisngi sha kawei ka dong bad shisngi sha kawei pat bad kumta ter ter, ula pynpaw ruh ka jingai khublei ïaka jingtrei bha u Contractor uba la pynpoi um sha ki 90 ki longïing da ka jingkyrpad ka shnong.
Ula pynshai halor ka rukom pyntrei ïa ki top um hapoh ka shnong bad la shna ïa ki katkum ka jingibiang ka jaka ban pynpoi um.
Haba pynkut u kyntu ïa ki seng ban trei da kaba bishar shwa ïa ki kam, khnang ba kan ym ktah na ka bynta ka jingmyntoi jong ka shnong ka thaw.
