Ka Hynñiewtrep Youth Council (HYC) Elaka Shilliang Myntang hynnin ka sngi Thohdieng 13 tarik u Lber kala lap ïa bun tylli ki trok kit dewïong beaiñ kiba ïaid na Laskeiñ-Barato ban poi sha Assam.
Ka seng ka sngewlyngngoh halor ka jingïoh lat kitei ki trok kit dewïong beaiñ ban jam lyngba ïaki Pulit Out Post kiba don ha Raliang, Barato nalor ba la pynmih hukum da ka High Court bad maham tyngeh ïaki nongtih dewïong beaiñ. Wat ka sorkar kala pyndonkam ruh da ki drone ha man ki jaka ba don u dewïong hynrei kumno pat kitei ki trok ki dang ïoh lad ban ïaid bad naei ki ïoh ïa u dewïong ban kit, la buh jingkylli ka seng.
La pyntip dang ha kine ki bnai bala dep ka seng kala maham ïaki kali bakit palat pud ban ïaid lyngba na une u surok ba dang shu dep trei lyngba ka skim PMGSY uba jrong kumba 16.20 Km ka jingjrong. Kumta ka seng sa shisien ka maham ban buh da ka jingujor sha ka tnad PWD namar ïa u surok dei ban kit hapoh 9 metric ton hynrei ka jingkit shaba palat pud da ki 30 ne 40 ton kala ktah shibun eh.
Shuh shuh ka seng kan leit ruh ban ujor kumjuh sha u DC uba long u khlieh duh jong ka District, halor ka jingïoh bor jong kitei ki kali kit dewïong beaiñ ban ïaid laitluid khlem patiaw eiei, la pynkut ka kyrwoh bala phah da u President ma P. Shylla.
