U MDC ka 4-Amwi Khliehtyrshi ma Madonbai Rymbai uba ju long u CEM barim ka JHADC haka jingkren sha ki lad pathai khubor haka 12 tarik u Lber ula ong hapoh ka Jaiñtia Hills Autonomous District Council (JHADC) kila don haduh 3 tylli ki jingeh ba hakhmat eh kata kaba nyngkong ka jingeh ha ka jingkyrduh pisa, kaba ar ka jingbym lah shuh ban pynmih pisa bad kaba lai Council kaba la jan khyllem noh.
Katba haka jingïadei bad ki Cement Plant kiba wan pynïaid da ki bar jylla, da kaba u kdew katkum ka Regulation Act 1954 shisien bala wan shong kino kino ki bar jylla ki hap ban siew ïaka khajna, hynrei kat katei ka kam Business kaba heh bala leh da ki bar jylla, ka Council ka khlem ïoh lum khajna eiei na ki, na kane ka pynpaw ba jur ka jingduna pisa, la ong u ma Rymbai.
Ula kyntu ïa ka Executive Committee (EC) ka JHADC kan wad ki lad ki lynti ban thaw ïa ki project ba thymmai lyngba ka sorkar kmie, da kaba ong ha ka por ba u long kum u CEM haduh u snem 2018 ula wanrah ïa ki project kaba haduh 18 klur shaneng hynrei kaba sngewsih ïa u ba um shem ïoh lad ban pyntrei ïa ka namar ka jingshah rem ha u snem 2019, ula kdew ba ïaka Building thymmai jong ka JHADC la pyntrei da katei ka pisa kaba ula wanrah.
Shuh shuh ula kynthoh halor ka jingbym pyntreikam ïa kawei ka Protected Forest kaba don hajan shnong Jarian Thangbuli kaba la tip kum ka Myrkeiñ Protection Forest ka JHADC kaba lah ban pynkiew ïa kam jngohkai pyrthei bad pynïoh nong ïa ka Council. Kumta u kyntu ïaka EC ba kan leh ïa kaba donkam naka bynta katei ka Myrkeiñ Protection Forest hapoh une u snem 2026, 2027 da kaba pynkhreh ïa ki jingdonkam kiba biang nadong shadong katkum ka DPR khnang ban ïoh ki lad jingïarap pisa na ka sorkar kmie.
Ha ka jingïadei bad ka rukom jinglum khajna na ki ïew ki hat hapoh ka Council, u kyntu sa shisien ïa ka EC ban pyndep kloi ïa katei ka project kaba la sahteng la slem bha ka ‘Iawmusiang Shopping Complex’ kaba dang tei thymmai mynta, namar lyngba kane ka ïew kan pynmih khajna ïa ka Council bad kan long ka jingmyntoi ïa ki nongshong shnong ka Ri-Lum Jaiñtia Hills.
Ula kynthoh ruh halor ka rukom pyntreikam ïa ki Beat Office, Protected Forest katkum ka Regulation 1959 bad ki Nursery Tree Plantation. Hynrei kaba sngewlyngngoh ïa u kum u MDC hadien ba ula jop biang ha kane ka kynti 2025 u khlem ïohi pat bala pyntreikam pura ïa ki.
U ma Madonbai Rymbai ula ong ïa ki Beat Office, kim lah satia ban ai sha ki riew shimet kiba khlem don jingtip eiei ban pynïaid ïa ki kam, da kaba ai nuksa ïa ki mar kiba kit na Jaiñtia Hills sha kiwei ki District bad shaduh Assam, kumta u kyntu ïa EC ba kan pynthymmai ïa kane ka kam na ka bynta ka jingmyntoi jong ka Council bad ban shngaiñ ka jaitbynriew.
