Na ka jingsdang wan jong ka aiom slap (Monsoon season) kan sa lah ban don ka jingther u lapbah, ka jingtied pyrthad, ka jinghap u phria bad ka jingtwa khyndew ha kiba bun ki jaka, kumta na ka liang jng u Deputy Commissioner & Chairman, ka District Disaster Management Authority (DDMA), East Jaintia Hills District, Khliehriat u la bthah ia baroh ki khlieh jong ki tnad treikam sorkar bapher bapher kiba don hapoh ka District ba kin long kiba husiar bad kiba la pynkhreh lada jia kano kano ka jinglynshop ki bor mariang bad ki dei ruh ban btah ia baroh ki nongtrei kiba shabar (field officials) ban long kiba la kreh ryngkat ki tiar ki tar ba donkam lada jia kino kino ki jingjia.
Ha ka juh ka por u DC ula kyntu ruh ia ki riew paidbah ban shim ia ki lad jingiada, ki dei ban ioh ia ka jingtip kaba biang por halor ka long ka man jong ka mariang bad ruh ban bud ryntih ia ki lad jingiada haba jia ka jingjur u slap, ka jingbeh lyer bad ka jingtied pyrthad.
Ha kum kine ki por ki briew ki dei ban rieh hapoh ki iing lane ha ki kali kiba don ka jingtap ba eh, da kaba kiar ba rieh ha ki iingtrep, ki trai dieng ne ki iingjaiñ. Ki briew ki dei ruh ban shong jngai ne kiar kum na ki tyllai electronic bad ki tiar lait, ki phone ba don tyllai, ki paia elektrik, ki tyllai elektrik kiba la hap sha madan, lada don ka jinghap jong ki tyllai bor ding dei ban pyntip mar mar sha ki bor ba dei peit.
Ki nongshong shnong ki dei ruh ban jngai na ki um ki wah, ban ym dei ban kiew shakliar ki lum, ne madan ba don sharud um, lane ki kynja ba jrong kum ki dieng, ki paia bad ki tower. La bthah ia ki nongshong shnong ba ki dei ban khang bha ia ki jingkhangiit bad ki jingkhangbah, dei ban kiar na ka jingrah ia ki tiar ba long nar kum ki shatri lane niah saikil, ka bha ban kup da ki sopti slap lada mih shabar ha ka por ba slap.
Lada don kino kino ki jingjia ki nongshong shnong ki lah ban phone ha kine ki number ba kynthup ia u Deputy Commissioner & CEO, DDMA, East Jaintia Hills ha ka number 70051-70039, District Disaster Management Officer (DDMO) : 87948-09841, Block Development Officer (BDO), Saipung C&RD Block : 96121-06744, Block Development Officer (BDO), Wapung C&RD Block : 70058-77634 bad Block Development Officer (BDO), Lumshnong C&RD Block : 96152-81169.
Kumta ki bor pyniaid District ka East Jaintia Hills District ki kyntu ia ki nongshong ban long kiba phikir, ban kiar na ka jingleit jingwan kaba khlem da donkam eh ha ki por ba sniew ka suiñ bneng bad ban iatrei lang bad ki bor pyniaid khnang ban wanrah ia ka jingiada bad ka jingpynkhreh ha shilynter kine ki aiom slap.
