Mynta ka sngi ha ka 17 tarik u March 2026, ka JNC lyngba ka “Save Jaiñtia Mission 2024” jong ka, ka la aiti daka dorkhas sha u Rikman Momin, President ka Bharatiya Janata Party Meghalaya State Unit, da kaba kyrpad ban tuklar mardor na ka bynta ban thaw bad pyntreikam ïa ka aiñ ba kyrpang kata ka “Small Scale Scientific Coal Mining Policy” katkum ki jinglong ba kyrpang jong ka Meghalaya.
Kane ka dorkhas ka wan hadien dang shen ha kaba u Myntri Rangbah ka Jylla Conrad Sangma u la pynphai ïa ka jingkitkhlieh ban pynbeit ïa ka mat polisi tih dewïong sha ka Sorkar Pdeng. Halor kane, ka JNC ka la leit ban ïakynduh ïa ka BJP kaba ïalam ïa ka Sorkar India ban shim ïa ka polisi kaba rai halor kane ka kam kaba kyrkieh kaba ktah ïa ki hajar ngut ki kam ki jam ha ka thaiñ Jaiñtia Hills.
Ka JNC ka la kyrpad kyrpang ïa ka kynhun BJP jong ka Meghalaya ban “phah ïa kane ka jingthoh sha ka tnad marpoh khyndew jong ka sorkar pdeng bad ka tnad dewïong jong ka sorkar India”, na ka bynta ban pyrkhat kyrkieh bad ban shimkhia ïa ka polisi kaba donkam.
Ka JNC ka pynpaw biang ia ka jingdawa jong ka ban weng noh ne pynkylla kaba donkam ia ka “SOP kaba heh 100 hektar” ban ioh tih dewiong katkum ka ain jong ka MMDR, 1957, kaba long kaba ym lah ban leh bad kaba ym iahap na ka bynta ka jaka riewlum jong ka Meghalaya. Ka Council ka khot ia ka polisi kaba ithuh ia ki jaka rit jong ki kpa tymmen bad kaba pynlah ia ki rukom tih dewiong kiba long katkum ka ain, kiba la pynbeit ryntih na ka bynta ki nongshong shnong.
Kawei ka mat ba kongsan jong ka dorkhas ka long ka jingdonkam kyrkieh ia ka “jingpeit bniah ia ka khyndew kaba bniah” ia ki jaka ba don u dewiong ha Meghalaya. Ka JNC ka la pynksan ba ki lum jong ka Jaiñtia ki don ïa ki jinglong ba kyrpang bha ha ka liang ka khyndew, kynthup ïa ki tduh dewïong kiba rit (1–4 phut), ki jinglong bym ïaid beit bad ki bym ïaid ryntih, bad ki dur zigzag ne kum ha kylleng ki jaka lum. Kine ki jinglong ki pynlong ia ki rukom tih dewiong kiba heh ba la ju pyndonkam ban long ki bym iahap bad kiba pynsniew ia ka mariang. Kumta, ka jingwad bniah da ka science ka long kaba donkam ban tip ia ki rukom tih dewiong kiba shngain, kiba biang, bad kiba iadei bad ka mariang kiba iadei bad ka thain.
Ka JNC ka kyrshan tyngeh ia ka “jingpynbeit tih dewiong kaba la pynbeit katkum ka science, kaba don jingkitkhlieh ia ka mariang, bad kaba kynthup ia ka imlang sahlang” kaba iada ia baroh ar ka mariang bad ka hok kamai jong ki trai jaka riewlum trai ri trai muluk.
Ia kane ka memorandum la aiti da ka Central Executive Committee (CEC) jong ka Jaiñtia National Council bad la ialam da u samla Sambormi Lyngdoh, President ka JNC CEC, ryngkat kiwei pat ki dkhot ba hakhmat jong ka seng.
Naka Liang U Rikman Momin u la pynpaw ba ka mat ba la wanrah da ka Jaiñtia National Council ka dei “ka mat kaba kongsan bha bad kaba shisha,” bad pynthikna ba un sa shim ïa ka ha ka por kaba kham kloi bad ki stad aiñ jong ka BJP Meghalaya State Unit. U la pynsngew shuh shuh ba ïa kane ka kam yn sa buddien bad ka Sorkar Pdeng katba lah, bad la pyntip ruh ba un sa pynlong ïa ki jingïalang kaba bniah bad ka Council ban ïa pyrkhat sani halor kane ka kam.
Ka JNC ka pynpaw ka jingkyrmen ba hapoh ka jingïalam jong ka BJP state unit, ka Sorkar Pdeng kan shim khia ïa kane ka mat kaba kongsan bad kan sdang ïa ki sienjam kiba donkam ban thaw ïa ki polisi kiba pynpaw ïa ki jingshisha ba shapoh jong ka Jylla Meghalaya.
