Ka Khasi Students’ Union (KSU), South West Border Circle ha ka jingia synran lang ka KSU, East Jaintia Hills District Unit, ha ka 17/03/2026 ki la leit ban aiti ïa ka memorandum sha u Superintendent of Fisheries, East Jaintia Hills District, halor ka jingjia kaba sngewkhia bad kaba ju jia man ka por tang shu wan u slap thymmai, kata ka jingïap ki dohkha doh um ha Wah Prang.
Ka Union ka la kdew ruh ïa ka jingujor kaba la dep phah mynshwa da u wei u samla sha ka office u Deputy Commissioner bad kumjuh na ka liang ka ophis u Deputy Commissioner, East Jaintia Hills District da ka shithi No. EJHD/Fish-13/Pt-1/182 dated 13th May 2025 ka la phah sha ka tnat Fisheries ban leh ïa ka jingtohkit bad ban ai ïa ka kaiphod. Hynrei haduh mynta ym pat shym la pynbna paidbah ïa kano kano ka kaiphod ne jingpynbna kaba shai halor katei ka jingjia.
Ka KSU ka la pynpaw ruh ba ki jingïap ki dohkha ka la jia biang ha ka 14 bad 15 tarik Lber 2026 ha kajuh ka wah, kaba la pynlong ïa ki paidbah nong shong Shnong jong katei ka thaiñ ban sngewkhia jur halor kane ka lah ban jia na ka jingpynjaboh ne ki kynja bih ha ka um bad ka jingma kaba lah ban ktah ïa ka koit ka khiah jong ki briew ki ba pyndon kam ia ka um bad bam ia ki dohkha na katei ka wah.
Kumta halor kane, ka KSU ka la kyntu jur ïa u Superintendent of Fisheries ban pynsted mardor ïa ka jingtohkit, ban lap ia ka daw tynrai jong ka jingïap ki dohkha bad ban shim ïa ki sienjam kiba donkam kloi katba lah. Ka KSU ka dawa ruh ba ïa ka kaiphod bad ki sienjam ba la shim dei ban pynbna paidbah khnang ban wanrah ïa ka jingshai sha ki Paidbah ha ka ba iadei bad ki jingma ha ka ba pyndonkam ia ka tei ka um na ka tei ka wah bad kumjuh ban bam ia ki doh um ba don ha katei ka wah.
Shuh shuh, ka KSU ka la kyrpad ïa ka tnat ba kan pynbna paidbah da ka kaiphod kaba shai la ki dohkha na Wah Prang ki long ne em kiba shngaiñ ban bam, khnang ban ïada ïa ki paidbah na kino kino ki jingma ïa ka koit ka khiah.
Nalor kata, ka Union ka pynrem jur ïa ka jingbym shimkhia jong ka Jaintia Hills Autonomous District Council (JHADC), kaba dei ban long ka nongsumar bad nongïada, hynrei kam shym la shim ïa ki sienjam kiba biang ban ïada bad pynneh pynsah ïa katei ka wah bad ban wad ïa ka daw tynrai jong kane ka jingeh, ha ka jaka ba kan shim kita ki sienjam la shem pynban ba ka JHADC ka shait mlien pynmih tender lilam ban ailad ban tong dohkha na kane ka wah sha ki riew shimet, kaba ym ïarap eiei ban pynbeit ïa ka jingeh ba don ha katei ka wah.
Ka Union ka ban jur ba kane ka jingiap jong ki dokha na kane ka wah ka long kaba ktah jur ïa ka mariang bad ka ktah ia ka jingïoh jingïarap jong ki nong shong Shnong jong kane ka thaiñ ki ba shait mlien ban khwai bad im ja kpoh na kane ka wah, ban pyrkhat ia ka koit ka khiah bad ka jingshngaiñ jong ki paidbah kiba shaniah ha kane ka Wah. Kumta na ka liang ka seng ka buh ka jing dawa ban shimkhia mardor na ki bor ba dei peit ha ka ba iadei bad kane ka bynta.
Ha ka juh ka por ka seng lymba kane ka kyrwoh ka phah ka khubor sha ka JHADC ba naduh mynta u snem ka seng kan nym ailad shuh ia ka JHADC ban Die Lilam ia katei ka wah sha ki Riew shimet lane sha kino kino ki kynhun bad lada ka JHADC ka dang kuman bad bteng ban iai die Lilam ia katei ka wah ka seng kan sa shim da ki sienjam ba kham eh.
Kane ka long katkum ka kyrwoh na samla Pynshngaiñ Lamin, Publicity Secretary KSU South West Border Circle.
