U Nongialam ka Liang Pyrshah ha Khasi Hills Autonomous District Council u Bah Titos W Chyne haba iakren bad ki lad pathai khubor ha ka 26 tarik Lber 2026 u la ong ba ka EC ka dei ban buh hakhmat eh ban pynkylla ia ka AD Rule 128, haba iadei bad ka jingshim bynta halor ka hok thep vote ha District Council.
U la kyntu ruh ïa ka EC ban buddien ïa ka jingpynkylla kaba dang sahteng ha u snem 2018 kaba la mynjur hapoh u CEM barim, (L) HS Shylla da kaba kdew ba kane ka bill kaba kynthup ïa baroh kawei ka AD Rules ka dang ap ïa ka jingmynjur hadien ba la eksamin da ka sorkar.
U bah Chyne u la ong ba wat la ka EC ka lah ban rai la kan pynkylla tang ia ka Rule 128 ne ban bishar bniah ia ka rukom treikam baroh kawei, hynrei ka por mynta ka dawa ban leh kyrkieh ia ka AD Rule 128.
Halor ka jingdawa jong ka KHNAM ban khot ia ka dorbar kyrpang, u la ong ba kane ka kam ka shong ha ka EC, da kaba bynrap ba ki MDC ka liangpyrshah ki la buh por ban iakynduh ia u CEM u bah Winston Tony Lyngdoh ban iakren ia kane ka kam.
U la ban jur ruh ia ka jingdonkam ban iada ia ka hok jong ki trai ri trai muluk ha ki elekshon sha District Council watla u la kdew ba kano kano ka rai halor ka hok thep vote kan donkam ia ka jingiasngewthuh jingmut kaba kham jylliew.
Ha kajuh ka por, u la pdiang sngewbha ia ka jingpynkylla kaba dang shen ha Garo Hills Autonomous District Council, da kaba ong ba ka dei ka sienjam kaba dei bad ai jingmut ruh ba ka KHADC bad ka JHADC ki lah ban shim ia kajuh ka rukom.
Khatduh u la pynskhem ba ki jingpynkylla ha ka por ki long kiba donkam ban weng ia ki jingeh bad ban iada ia ki jingmyntoi jong ki trai ri trai muluk haba iadei bad ka jingthep vote ha District Council.