Ka Hynniewtrep Integrated Territorial Organisation (HITO) Jaiñtia Hills, hapoh ka jingialam u Khiejoit Niang haka jingiadonlang u General Secretary ka Central Body u bah WN Dkhar kila kyntu iaki paidbah ba kim dei ban siew iaka bai Toll-Gate kaba don ha Ialong, West Jaintia Hills bad ha Lumshnong East Jaintia Hills District.
Kane ka jingkyntu ka seng iaki paidbah ka long hadien baka seng kala jurip ia u surok National Highway-6, u ba naduh Jowai shaduh Rattacherra, ki company ba pyntrei ia une u surok kim pat dep ban trei katkum bala mang ne buh ban trei, u surok u dang long uba sah teng (Incomplete), kaba dang shim por ban pynbha ia u.
Shuh shuh naka liang ka seng kala ong ba katkum ki kyndon ka Ministry of Road Transport and Highways, ba ka jingshim bai Toll Gate na ki kali kiba iaid lyngba ki toll plaza ka dei halor ki nongrim ban pynbha bad maramot ia ka jingjot jong u surok, hynrei katkum ka jinglap jong ka seng ba ha baroh shi lynter u surok NH-6 ym pat iahap ban shim ia ka bai Toll gate, na ki kali kiba pyndonkam ne iaid lyngba ia une u surok bad ha kajuh ka por ki nongpyniaid jong ki Toll Plaza ruh kim lah ban pynbor ne khrong iaki trai kali ban siew haba u surok um pat bha bad lada leh jubor ki trai kali ki lah ban ujor sha ka Ministry of Road Transport and Highway.
