U bah Wanbun N Dkhar, u ba bat iaka kam General Secretary ka Hynniewtrep Integrated Territorial Organisation (HITO), Central Body, naduh u snem 2021 u la shim iaka rai ban shongthait noh naka katei kam na ki daw shimet jong u hi.
U bah Dkhar u la ong ba ula don haka jylli treimon sngewbha naduh u snem 2008 haduh kine ki sngi ba mynta bad kala dei ka por ban shongthait noh bad ban pyrkhat da kiwei pat ki lad ki lynti jingshakri ia u paidbah. Na ka liang jong u bah Dkhar u la ai khublei iaki para nongialam ka CEC bad ki dkhot kiba ai ia u ka jingkyrshan bad ai mynsiem haka jingiaid lynti jong u kum u General Secretary ka Seng naduh ba sdang iaka haduh mynta bad kumjuh ruh ia baroh ki paradoh parasnam ka bri u Hynniewtrep kiba shait ai mynsiem ia u haka jingshakri paidbah.
Shuh Shuh u bah Dkhar u la ong ba ka jingshakri paidbah kam kut tang haki jylli treimon sngewbha hynrei haba ong ka jingshakri ka mut ki don bun ki rynsan ai jingshakri.
Kum u nongialam uba la rangbah u kloi ban iarap iaki paidbah ha kano kano ka bynta ba ki don kam katkum ka bor ba shah, namar u ngeit iaka jingong ba ka jingshakri iaki para bynriew ka dei ka jingshakri ia u Blei bad u la ong, “Kaba kongsan kaba ngi dei ban kynmaw ka long ba ngi dei ban don kata ka mynsiem jingsngewnguh kaba burom mar kylliang bad ka jingiaishah khnang ba ngin lah ban jop haka jingim jong ngi.”