Ki ar tylli ki shnong kiba kynthup ia ka Huroi bad Lahalein, mynta ka sngi ba ar, ki la mih padibah na la ki shnong ban leit shaduh sha nongbah Jowai ban pynpaw ia ka jingpyrshah kaba jur ia ka ophis jong ka JHADC kumjuh ruh ia u CEM bad u MDC ka thaiñ, halor ka jingai ia ka Sanat sha kawei ka kyntoit kaba dang hapoh ka shnong Huroi kaba la tip kum ka Umpyrshin sha u Jonny Suchen uba long u rangbah ka shnong Umpyrshin.
Hynne ka sngi ki nongialam shnong ki nongshnong shnong kynthei bad shynrang ki la wan poi ha Jowai, ha kaba la pynlong ia ka jingialang kaba lyngkot ha jan Stan War Jowai ha shwa ban iaid rally shaduh sha ophi jong ka JHADC.
Hynrei haba poi ha jan jong ka Gate JHADC ki bor District bad ki pulit ki la shah ban rung tang 10 ngut ki na kitei ki ar tylli ki shnong ban rung shapoh ka ophi jong ka JHADC. Hynrei mynta ka sngi na ka liang kitei ki nongialma shnong kim shym la ioh ban ia kynduh ia u CEM ka JHADC kumjuh ruh ia u Dy. CMC bad wat ia u MDC ka thain jong ki ruh, namar kim don ha ophis. Hynrei ki la ioh ban ia kynduh ia ka Secretary ka JHADC.
Na ka liang jong kitei ki nongialam shnong hadien ba ki la dep ban ia kynduh ia ka secretary ka Council, ki la ong ba ka JHADC ka la ong ba ka JHADC kan sa thaw ia ka Tribunal ha kane ka 6.04.2026, na ka bynta ban pyrkhat ia kane ka kam jong ki. Ha kaba na ka liang jong ka shnong.
Katba na ka liang ki nongialam shnong ki la dawa na ka Council ba la da kam pynbeit ia kane ka kam hapoh ka por ba la buh bad lada jia kano kano ka jingjia sha katei ka thain, ka District Council ka hap ban kit khlieh hi.
La ong ruh ba kane ka wan jia haduh ba hap ban iamih paidbah ka dei na ka daw ba u surok bah ne u High Speed Corridor un wan iaid lyngba kane ka thain dei na kane ka daw bah sa mih kane ka jinghuri hura.
