Ka Jaintia National Council (JNC), Ladrymbai Circle, ka la pynpaw ia ka jingsngewkhia kaba jur ha kaba iadei bad ka jingdheng kali kaba dang iai bteng ha Ladrymbai, khamtam ha shilynter ka surok NH-6, Rymbai road, kaba la wanrah ia ka jingeh kaba khraw ia ki paidbah.
Katkum ka jingong u President ka JNC, Ladrymbai Circle u bah Jopsing Latam u la ong ba kane ka jingkhapngiah bad jingdheng kali ka shait jia na ka jingpynieng khlem akor bad khlem pyrkhat ki kali ba buh harud surok. Kane ka jinglong jingman ka la pynlong ïa ka jingdheng kali kaba man ka por, kaba la ktah ïa ki nongleit nongwan man ka sngi, ki khynnah skul, bad wat ïa ki jingshakri ba kyrkieh.
Ka seng ka la pynpaw shuh shuh ba ka jingbym don ki Pulit pyniaid kali ha katei ka thaiñ ka la pynjur ia ka jingeh, kaba la wanrah ia ka jingkulmar bad ka jingpynslem ia ka jingleit jingwan jong ki kali.
Halor kane ka jingjia, ka JNC Ladrymbai Circle ka la ujor sha u Ophisar ba dei peit ka Ladrymbai Police Outpost ba un shim khia mardor ïa kane ka kam. Ka Council ka la kyrpad kyrpang ruh ban buh ym duna ia ki arngut ki Pulit pyniaid kali ha katei ka jaka ba shah ktah khnang ban pynbeit ia ka leit ka wan bad ban pynthikna ia ka jingiaid lynti kaba suk.
“Ka jinglong jingman mynta ka wanrah jingeh man ka sngi ïa ki paidbah, bad donkam ban shimkhia kyrkieh ban pynphai biang ïa ka jingsuk bad ka jingshngaiñ ha ki surok,” ong ka Council.
Ka JNC ka la pynpaw ka jingkyrmen ba ki bor pyniaid kin shim ia ki lad ki lynti kiba kloi bad kiba donkam ban weng ia katei ka jingeh na ka bynta ka jingsuk bad jingshngaiñ jong ki paidbah.