Ka Khasi Authors’ Society (KAS), Shnat Jowai mynta ka sngi Saitjaiñ 11 tarik u Ïaïong, 2026 haka jingïalang pynshai paidbah ha Iawmusiang Jowai, halor ka jingdawa ban pynlong Ktien Sorkar (official language) ïa ka ktien Khasi ha ka jylla Meghalaya.
Na ka liang u President Khasi Authors’ Society Seng Kmie u Dr. DRL. Nonglait, haba ai jingkren ula dawa na ka sorkar jylla ban pynlong noh ïa ka ‘Special Session’ hapoh u Bnai Ïaiong, 2026 na ka bynta ban pynlong ktien sorkar ïa ka ktien Khasi bad hadien kata dei ban pyntip sha ka sorkar Delhi ba ka ktien Khasi kala long ka ktien sorkar bad ban pynrung noh ïa ka ha ka khyrnit kaba phra hapoh ka Riti synshar jong ka Ri India.
Khnang ba kane ka jingdawa kan long kaba jop ula khot ïa baroh ki nongshong shnong ka bri u hynñiewtrep ban don ka jingïatylli lang kawei ka jingmut naduh ki paidbah, ki kynhun sengbhalang bad ki MLA sorkar.
Lada u Myntri Rangbah ka jylla, ki Symbud Myntri Rangbah lem bad ki myntri sorkar kin ïohsngew ïa kane ka jingdawa ki dei ban khot noh ïa ka Special Session bad Amment noh ïa ka Meghalaya Language Act 2025 kaba la kdew ba ka ktien Khasi bad Garo ki dei ki Associated official bad ban pynlong Ktien Sorkar ba pura noh ïaki ha ka Dorbar Kyrpang (special session).
Shuh shuh u la pynsngew ha u bnai October 2025 ka KAS kala dep ban dawa na u Myntri Rangbah ban pynlong ktien sorkar da kaba ai copy sha baroh ki MLA hynrei ym don satia ka mat ïakren ha kane ka Dorbar Tlang bala dep, kaba la pynlong ïa ka KAS ban leit mih noh sha u Paidbah lyngba ki shnat treikam ha kylleng ka bri u Hynñiewtrep.
Ula pyntip ïa kane ka jingleit pynsngew paidbah la dep pynlong ha Nongstoiñ, mynta ha Jowai bad shen yn pynlong sha ha Khliehriat, Mairang, Mawkyrwat, Nongpoh, Sohra bad ha kiwei de ki jaka.
Ha kane ka jingialang la iadonlang ki dkhot ka KAS na ka shnat Jowai kynthup ia u ma M.M. Thaiang, ma W.E. Dhar bad ka kong S. Bareh. La iadon ruh ki dkhot na ki sengbhalang ba kynthup ia ka KSU, JSU, HYC bad na ka FKJGP.
Ia ka jingialang la pyniaid da u ma N.R. Gassah, President KAS shnat Jowai.
