Ka nongrwai ba pawnam jong ka Ri India, ka Asha Bhosle, kaba ka sur jong ka, ka la pynpaw ia ka jingsawa ha ka Hindi cinema ne Bolywood la palat hynriew phew snem bad ka la rwai haduh 12,000 tylli ki jingrwai, ka la khlad noh ha ka rta kaba 92 snem ha Breach Candy Hospital ha kane ka sngi U Blei 12.04.2026. Ia ka Asha Bhosle la kha ha ka 8.09.1933.
U khun jong ka, u Anand Bhosle, u la pyntikna ia kane ka khubor shabar jong ka hospital, da kaba pyntip paidbah ba kito kiba kwah ban leit ai khublei khatduh ki lah ban leit sha ïing jong ka ha ka sngi Nyngkong ha ka por 11 baje mynstep, bad ka jingleh niam khatduh yn pynlong ha ka por 4 baje janmiet ha Shivaji Park. Katba ka khubor ka la saphriang, ki jingsngewlem bad jingsngewsih ki la tuid na kylleng sawdong, katkum ka khubor na ka ANI.
Ka Myntri Rangbah jong ka jylla West Bengal, ka Mamata Banerjee, ka la pynpaw ia ka jingsngewsih halor kane ka jingkhlad jong katei ka nongrwai ba pawnam. Ha ka tweet jong ka, ka la ong, “Nga sngewsih bha halor ka jingkhlad noh jong ka nongrwai ba khraw tam, ka Asha Bhosle. Ka dei ka nongrwai kaba pynkmen bad pynsngewtynnad ia ki paidbah ha kiba bun ki pateng. Ka la rwai ruh shibun ki jingrwai Bengali bad ka long kaba pawnam bha ha Bengal ruh.”