Ka Jaiñtia National Council JNC 7Chnong Circle ka la pynpaw ïa ka jingsngewkhia kaba jur halor ka jingthut bording kaba la neh slem, kaba ktah ïa ki hynniew tylli ki shnong, bad hynne ka Sngi ka seng kala aiti ruh ïa ka jingujor sha u Sub-Divisional Officer (SDO) ka Meghalaya Power Distribution Corporation Limited (MePDCL).
Ki 7 shnong kiba kynthup iaka Moolamanoh, Moolang, Musniang, Musniangrim, Rangad, Lumputhoi, bad Moonongtdu—ki la mad ïa ka jinglip bording kaba man ka por bad kaba neh slem bha, ka neh naduh katto katne kynta haduh shisngi baroh kawei. Wat hapdeng ka jingpynbiang bording kaba khlem iahap, ki nongshong shnong ki dang ioh ia ka bill bording kaba rem.
ka JNC ka la pynpaw ba ki nongpyndonkam bording ki shah siew pura wat hapdeng ka jingpynbiang bording kaba khlem iadei, kaba la pynmih ia ka jingsngewkhia halor ka jinglong hok bad jinglong khuid Jong ki nongpyndonkam.
Ka seng ka buh ruh ka jingkylli ba ki daw kiba ju jia kum ki jingthut ha ki jingtei ne ki jingthut kiba ïadei bad ka jinglong ka suiñbneng kiba pynlong ïa ka jingduh bording kaba ju jia man ka por, hynrei ym don satia kum kata, te balei ka bording ka lip?
Kane ka mat ka la ktah khamtam eh ïa ki samla pule kiba pynkhreh ïa ki eksamin, kaba la pynthut ïa ki rukom pule jong ki bad kaba la pynmih ïa ka jingsngewkhia halor ka jingduna ha ka pule puthi ha ki jaka ba shah ktah.
Haka jingiakren, u SDO u la pynthikna iaka seng ba ia kane ka kam yn sa shimkhia bha bad yn sa pynbeit noh mardor. U la pynthikna shuh shuh ba kum kine ki jingjia kin ym shah ban jia biang.
Ka JNC ka la kyntu ia ka MePDCL ban pynthikna ba ka jingsiew bai bording kan iadei bad ka jingpynbiang ba shisha bad ban shim ia ki lad ki lynti ban pynbeit kloi ia ka jingpynpoi bording da kaba biang, bad lada kan iai jia kumne ka seng kam sa shim pat da kiwei ki lad ba tyngeh.