Ka Khasi Students’ Union (KSU) bad ka Co-Ordination Committee on International Border (CCIB) kila pynrem jur ïa ka jingshna surok ban ker sainar shiah da ka National Buildings Construction Corporation Limited (NBCC) ha khappud ka Ri India bad ka Bangladesh khlem da ïoh jingbit lane kynjoh ktien shwa na ki trai jaka.
Kane ka jingleh jubor ka NBCC kaba la pynmih ïa ka jingïakynad kaba jur hapdeng ki ar liang naduh ki trai jaka bad ki nongpyntrei surok, la kynthoh ruh ïa u Deputy Commissioner u Abhinav Kumar Singh namar ba um shym la lah ban weng ïa ki jingeh jong ki trai jaka bad la pyrshang ban pyntrei ïa katei ka projek da ka bor.
Na ka liang ka CCIB bad ka KSU kila kyntu ïa u DC ban pynsangeh noh ïa kane ka kam katba ym pat ïoh ka jingmynjur lang da ki trai jaka katkum ka jingdawa. Kila buh jingkylli ïa ka jingbym shimkhia jong ka sorkar ïa katei ka kam haduh mynta bad mano ba la ai jingbit ban pyntrei ïa katei ka projek da ka bor.
Ka seng KSU kala kren shai ba kim pyrshah ïa ka jingker sainar shiah, hynrei katei ka kompani kala leh bor khlem da kynjoh ktien na ki trai jaka bad na ka CCIB. Halor kane ka seng ka ïeng skhem na ka bynta ki trai jaka, khnang ba ki jaka puta kiba dei ki jaka rep jaka riang, kim dei ban shah ktah na kane ka jingker sainar shiah.