Kum shi bynta ban pynkhlaiñ ia ka jingpynkhreh ban ai jingiarap ha ka por ba jia kino kino ki jinglynshop jong ki bor mariang na ka liang ka Deputy Commissioner & Chairperson, District Disaster Management Authority, East Khasi Hills District kala kyntu ia kino kino ki trai kiba don ia ki Drone ba kin sngewbha ban ai jingtip sha katei ka ophis khnang ban tip ia ka jingdon jong ki Drone bad ki jaka ba ki don ne treikam.
La kyntu ia ki riew shimet, ki kynhun bad ia ki tnat sorkar ruh kumjuh kiba don ia ki Drone bad la pynshlur ia ki ban long ki nongiarap mon sngewbha da kaba pyndonkam ia ki Drone jong ki kum ki lad jingiarap haba jia ki jinglynshop mariang.
Kino kino kiba ai jingtip, ki dei ban thoh shai katno tylli ki don ia ki Drone, ki model jong ki Drone, ka jaka ha kaba ki don ne ki pyntreikam ia ki Drone jong ki, ka kyrteng jong u ne ka trai, ban ai ia ka contact number kum ka mobile number bad ka email address jong ki.
Ki trai ki lah ban leit ai ia kane ka jingtip sha ka ophis Deputy Commissioner & Chairperson (DDMA) kloi katba lah, lane ki lah ruh ban phah lyngba ka email sha ka ddmaeastkhasihills@gmail.com.